Oblys ortalyǵyn Túrkistanǵa kóshirýdiń jergilikti halyq úshin mańyzy zor

TÚRKІSTAN. QazAqparat - Oblys ortalyǵyn Shymkentten kıeli shaharǵa kóshirip, ataýyn Túrkistan dep qaldyrý - úlken tarıhı oqıǵa. Túrkistan qalalyq aqsaqaldar alqasynyń tóraǵasy, Parasat ordeniniń ıegeri Jarylqasyn Áziretbergenuly osylaı dep pikir bildirdi, dep habarlaıdy QazAqparat. 

«Jalpy Túrkistannyń oblys ortalyǵy atanýy - qala turǵyndary ǵana emes, búkil Qazaq eli úshin qýanyshty jańalyq. Sebebi, Túrkistan - qazaq memleketin, qazaq handyǵyn qurýda úlken róli bar qala. QR Prezıdenti N. Nazarbaevtyń sheshimimen Túrkistan qalasyn oblys ortalyǵyna kóshirýi - biz úshin mańyzy zor tarıhı oqıǵa. Túrkistannyń oblys ataýy retinde qaıta jańǵyryp jatqany bizdi qýantady», - deıdi Jarylqasyn Áziretbergenuly.

Onyń aıtýynsha, Túrkistan Qazaq handyǵynyń astanasy bolǵan kıeli meken. Elbasymyz Túrkistandy «búkil túrki halyqtarynyń  rýhanı astanasy» dep atady. Bul ataý Túrkistan qalasyna úlken abyroı jáne sonyń arqasynda búkil túrki tildes halyqtarmen baılanysymyz arta túspek.

«Han ordasy bolǵan Túrkistan oblys ortalyǵy retinde qazaqtyń órkendeýine óz úlesin qosa alady. Túrkistan halqynyń atynan QR Prezıdenti N.Nazarbaevqa oblys ortalyǵyn Túrkistan qalasyna kóshirgeni úshin myń da bir alǵys aıtamyn!», - dedi aqsaqalar alqasynyń tóraǵasy.

Esterińizge sala keteıik, keshe Elbasy N.Nazarbaev Shymkentke respýblıkalyq mańyzy bar qala mártebesin berý jáne oblys ortalyǵyn Túrkistan qalasyna kóshirý týraly Jarlyqqa qol qoıǵan bolatyn.