Oblys ákimi «Qazaq tili» qoǵamyna keńse taýyp bermegen orynbasarlaryna shúılikti

ASTANA. QazAqparat - Qazaqstan halqynyń tilderi kúni qarsańynda Qaraǵandy qalasyndaǵy Dostyq úıinde saltanatty shara ótti. Qaraǵandy oblysynyń ákimi Erlan Qoshanov merekeniń mańyzdylyǵyna toqtalyp, memlekettik tildi nasıhattaýshylarǵa qoldaý kórsetý jáne ony úırengisi kelgenderge kómektesý qajettigin atap ótti, dep habarlaıdy QazAqparat óńir basshysynyń baspasóz qyzmetine silteme jasap. 

Shara barysynda Erlan Qoshanov «Qazaq tili» qoǵamyna jeke ǵımarat taýyp berýdi tapsyrdy. 

«Biz búgin til saıasatyn qoldaý kerektigi týraly jıi aıtamyz. Osy jerde biz «Til janashyry» syılyǵyn tabys etý saltanatyna jınaldyq. «Til janashyry» degen sózdiń ózi tilimizge bar janymyzben qoldaý kórsetip, janymyz ashý kerek degendi bildiredi. Tildi úırenýge monıtorıng jasaýmen aınalysatyn arnaıy organ nemese ortalyq qurý qajet. Jýyrda ǵana Qazaq tili qoǵamynda óz keńsesi joqtyǵyn bildim. Sonda biz qoldaýdy osylaısha kórsetip jatyrmyz ba?», - dedi Erlan Qoshanov.  

Oblys ákimi óziniń orynbasaryna jaqyn arada bul máseleni sheshýdi júktedi. 

«Qazaq tili» halyqaralyq qoǵamy 1989 jyly qurylǵan bolatyn. Qaraǵandyda onyń fılıaly qyzmet etedi. Qoǵam sózdikter qurýmen, ǵylymı-ádistemelik quraldar men oqýlyqtar shyǵarýmen, qazaq tilin latyn qarpimen oqýdy nasıhattaýmen aınalysady.