Oblys ákimdigi Shymkentten Túrkistanǵa kóship bardy
Bıylǵy 19 maýsymda Elbasy Nursultan Ábishuly Nazarbaev Ońtústik Qazaqstan oblysyn Túristan oblysy dep qaıta qurý jáne onyń ortalyǵyn Shymkentten Túrkistan qalasyna kóshirý týraly tarıhı Jarlyqqa qol qoıǵany belgili. Búgin osy tapsyrmany oryndaý úshin túrkistandyq memlekettik qyzmetkerler Shymkentten Túrkistan qalasyna kóship keldi. Oblys basshysy Janseıit Túımebaev bastap kelgen kóshti Túrkistan qalasynyń ákimi Álipbek Óserbaev bastaǵan zııaly qaýym ókilderi men el aǵalary saltanatty túrde kútip aldy. Kezdesýde aımaq basshysy Túrkistandy túletýge kelgen memqyzmetkerlerdiń jumysyna sáttilik tiledi.
«Búgingi kún tarıhı oqıǵaǵa kýá bolǵan kópshiliktiń jadynda uzaq saqtalady. Oblys ortalyǵynyń Túrkistanǵa kóshirilýinde úlken mán bar. Birinshiden, Túrkistan ǵasyrlar boıy Qazaq handyǵynyń astanasy boldy. Toǵyz joldyń torabynda ornalasqan. Burynǵy Uly Jibek jolynyń boıynda qonys tebýiniń ózi bul shahardyń strategııalyq mańyzy zor ekenin kórsetip tur. Ekinshiden, qazaqtyń 21 hany men batyrlary, bı-sultandary men qaımaqtary osy shaharda jerlengen. Bunyń ózi Túrkistannyń Qazaqstan úshin qasıetti ortalyq ekeniniń kórinisi. Úshinshiden, Túrkistanda Túrki áleminiń uly ustazy, aqyn ári qaıratker Ahmet ıAsaýı babamyz ómir súrgen. Uly oıshyl ustazdyń kesenesiniń Túrkistanda salynýy, bul shahardyń talaı ǵasyrdan beri Túrkistan dep atalyp kele jatqany kóp nárseden habar beredi. Endeshe, Elbasy tapsyrmasyna sáıkes, biz Túrkistandy Túrki áleminiń rýhanı ári mádenı astanasyna aınaldyrýymyz kerek. Túrkistannyń jańarý kúnderi bastaldy. Túrkistandy birge gúldendireıik!» dedi oblys ákimi.
Saltanatty sharada belgili aıtysker aqyn Bekarys Shoıbekov memleket aldyndaǵy uly murattaryn oryndaý úshin kıeli shaharǵa kóship kelgen qyzmetkerlerge arnaý aıtsa, Túrkistan qalasynyń aqsaqaldary «azamattardyń qadamy oń bolsyn!» dep aq batasyn berdi.
Elbasynyń tarıhı Jarlyǵynan keıin Túrkistan qalasyn oblys ortalyǵyna aınaldyrý úshin úlken daıyndyq jumystary júrgizildi. Atap aıtqanda, Túrkistan qalasyn túrki áleminiń mádenı-rýhanı ortalyǵy retinde damytý boıynsha bas jospardyń eń úzdik tujyrymdamasyn ázirleýge ashyq halyqaralyq konkýrs jarııalandy.
Bas jospar bekitilgen soń soǵan sáıkes Túrkistan qalasynda jańa áýejaı, temirjol vokzaly, avtovokzal, kóptegen ákimshilik ǵımarattar men mádenıet oshaqtary salynady. Munan bólek 65 myń turǵynǵa arnalǵan jańa qalashyq boı kóteredi dep josparlanýda. Demek, aldaǵy jyldary Túrkistan qalasy úlken qurylys alańyna aınalady.
Munan bólek, Túrkistan qalasynda kásipkerlikti, aýyl sharýashylyǵyn damytýǵa da basa mán berilmek. Ásirese, ónerkásip jetekshi salaǵa aınalýy tıis. Sondaı-aq, Túrkistannyń aınalasynda jylyjaı men ıntensıvti baýlar kóptep ósirilmek. Bul bir jaǵynan aýyl sharýashylyǵy salasynyń damýyna áser etse, ekinshi jaǵynan týrısterge kórsetýge bolatyn ekotýrızm nysanyna aınalady.
Túrkistan oblys ortalyǵy ǵana emes, halyqaralyq dárejede tanymal qalaǵa, Túrki álemi ǵylymy men mádenıetiniń iri ortalyǵyna aınalady. Munda búkil túritildes elder qatysatyn ǵylymı konferentsııalar men mádenı sharalar turaqty túrde ótedi. Sondaı-aq, bul qalada Túrki akademııasy, Túrik keńesi men TÚRKSOI sekildi halyqaralyq uıymdardyń bólimsheleri ashylady.