Oblys ákimderiniń KPI-kórsetkishterine azyq-túlik qaýipsizdigin qamtamasyz etý deńgeıi engiziledi
10:28, 15 Naýryz 2022
NUR-SULTAN. QazAqparat – Oblys ákimderiniń KPI-kórsetkishterine azyq-túlik qaýipsizdigin qamtamasyz etý deńgeıi engiziledi. QR Premer-Mınıstri Álıhan Smaıylov Úkimet otyrysynda osyndaı tapsyrma berdi, dep habarlaıdy QazAqparat tilshisi.
Azyq-túlik qaýipsizdigin qamtamasyz etýdiń 2022-2024 jyldarǵa arnalǵan josparyn talqylaý barysynda Úkimet basshysy ol qujattyń iske asýynda óńir ákimderiniń jumysy mańyzdy ekenin atady.
«Josparda kózdelgen is-sharalar óńirlik damý josparlarynda da qamtylýy kerek. Oblys ákimderine azyq-túlik qaýipsizdigin qamtamasyz etý boıynsha naqty KPI bekitilýi tıis.
Jalpy, Azyq-túlik qaýipsizdigin qamtamasyz etý josparynyń jobasynda kórsetilgen tásilderdi maquldaýdy usynamyn», - dedi Álıhan Smaıyov.
Sondaı-aq, ol Aýyl sharýashylyǵy mınıstrligine atalǵan jospardy ári qaraı pysyqtap, búgingi talqylaýdy esepke ala otyryp, Úkimet sheshiminiń tıisti jobasyn engizýdi tapsyrdy.