Oblys ákimderi qomaqty qarajatty fýtbol komandalaryna emes, buqaralyq sportty damytýǵa bólý kerek - A. Muhamedıuly
«Mamandandyrylǵan balalar men jasóspirimder sporty mektepteriniń sany sońǵy kezderi artyp keledi. Ol mektepterde úsh júz myńnan astam oqýshylar bilim alýda. Jalpylaı alǵanda, balalar men jasóspirimderdiń on bes paıyzy sportpen jáne dene shynyqtyrýmen qamtylǵan. Bizdiń mınıstrlik tarapynan sport sharalaryn qarjylandyrýdy jetildirý úshin zańnamalyq bazalar jetildirilýde», - dedi A. Muhamedıuly.
Mınıstrdiń aıtýynsha, sport pen dene shynyqtyrý salasyn qarjylandyrýda úlken teńgerimsizdik oryn alyp otyr.
«Máselen, jergilikti oblys bıýdjetterinen qomaqty qarajat fýtbol men hokkeı komandalaryn qarjylandyrýǵa bólinedi. Al buqaralyq sportty qarjylandyrý qaldyq qarajat qaǵıdatymen júrgizilip jatyr. Bul durys emes ári kúrdeli másele. Biz osy máseleni zań júzinde retteýdi qolǵa alatyn bolamyz. ıAǵnı, oblys ákimdikteri negizgi qarajatty buqaralyq sportty damytýǵa jumsaýy kerek. Óıtkeni, qazirgi kúni ásirese aýyldyq jerlerdegi sportty damytý kenje qalyp barady», dedi mınıstr A. Muhamedıuly.