OAR Parlamenti Qazaqstanmen yntymaqtastyqty keńeıtýge múddeli

<p>ASTANA. KAZINFORM &ndash; Ońtústik Afrıkanyń zańnamalyq astanasy Keıptaýn qalasynda Qazaqstan Elshisi Erkin Ahınjanovtyń Ońtústik Afrıka Respýblıkasy Provıntsııalary Ulttyq Keńesiniń <em>(joǵarǵy palata)</em> tóraǵasy Refılve Mtsvenı-Tsıpanemen jáne OAR Ulttyq Assambleıasynyń <em>(tómengi palata)</em> spıkeri Andjela Tokozıle Dıdızamen kezdesýleri ótti.</p>

Kezdesýler barysynda Elshi QR Prezıdenti Qasym-Jomart Toqaevtyń basshylyǵymen elimizde júzege asyrylyp jatqan negizgi reformalar men bastamalar boıynsha egjeı-tegjeıli aqparattandyrdy.

Qazaq dıplomaty ekonomıka, saýda jáne bilim berý sııaqty birqatar negizgi salalarda, sondaı-aq ornyqty ózara is-qımyldy qamtamasyz etý úshin sharttyq-quqyqtyq bazany jetildirýdi usyna otyryp, Qazaqstannyń Ońtústik Afrıkamen ekijaqty yntymaqtastyqty nyǵaıtýǵa umtylysyn atap ótti.

Óz tarapynan, Ońtústik Afrıka Parlamentiniń palatalar basshylary eki el arasyndaǵy yntymaqtastyqty tereńdetýge múddeli ekenin málimdedi. Olar eki el arasynda birlesken jobalardy iske asyrý múmkindigine senim bildirip, nátıjesinde ózara tıimdi seriktestik úshin jańa múmkindikter týǵyzatyn atap ótti.

Kezdesýler qorytyndysy boıynsha taraptar ekijaqty parlamentaralyq baılanystardy damytý maqsatynda dıalogty jalǵastyrýǵa kelisti.