«OA + Japonııa»: Syrtqy ister mınıstrleri pandemııamen kúrestegi yqpaldastyqty talqylady

NUR-SULTAN. QazAqparat – Búgin QR Syrtqy ister mınıstri Muhtar Tileýberdi beınekonferentsııa formatynda «Ortalyq Azııa + Japonııa» dıalogy Syrtqy ister mınıstrleriniń kezekten tys keńesine qatysty, dep habarlaıdy QazAqparat.

«Atalǵan alań COVID-19 pandemııasyna qarsy turý aıasynda erekshe mańyzǵa ıe bolýda. Keńes barysynda taraptar pandemııamen kúrestegi tıimdi ózara is-qımyl máselelerine erekshe nazar aýdaryp, onyń óńir ekonomıkasy úshin jaǵymsyz saldaryn eńserý jáne syrtqy ekonomıkalyq qyzmetti jandandyrý máselerin qarastyrdy. Epıdemıologııalyq jaǵdaı, bir-birine gýmanıtarlyq kómek kórsetý jónindegi óńirlik yntymaqtastyq, azamattardy shet elderden qaıtarý máseleleri, sondaı-aq ekonomıkalyq utqyrlyq pen iskerlik belsendilikti qalpyna keltirý perspektıvalary talqylandy», - delingen QR SІM málimetinde.

Qazaqstandyq tarap Japonııa Úkimetine pandemııaǵa qarsy kúreste jan-jaqty qoldaý kórsetkeni, ozyq tájirıbelerdi engizý boıynsha eki eldiń sanıtarlyq-epıdemıologııalyq qyzmetteriniń ózara is-qımylyn nyǵaıtýǵa jáne vaktsına men jańa medıtsınalyq preparattardy ázirleý, ǵylymı-praktıkalyq kómek kórsetýge ázirligi úshin rızashylyǵyn bildirdi.

«Syrtqy saıası vedomstvolardyń basshylary osy format sheńberinde ózara saýda-ekonomıkalyq is-qımyldy qalpyna keltirýge baǵyttalǵan praktıkalyq kúsh-jigerdi biriktirý týraly sheshim qabyldady. Bul aspektide Japonııanyń ekonomıkalyq jáne tehnologııalyq áleýeti qyzyǵýshylyq týdyrady. Ony jalpy Ortalyq Azııa ekonomıkasyn jańǵyrtýda jáne birlesken jobalardy iske asyrý arqyly qoldanýǵa bolady. Keńeske qatysýshylar syrtqy saıasat vedomstvolary basshylarynyń kelesi 8-shi kezdesýi barysynda Japon bıznesiniń qatysýymen saýda, ınvestıtsııalar jáne agroónerkásiptik keshen salasynda naqty usynymdar ázirleýge kelisti», - dedi SІM-nen.

Aıta keteıik, «Ortalyq Azııa + Japonııa» dıalogy Japonııanyń bastamasymen shaqyrylǵan. Alǵashqy kezdesý 2004 jyly Nur-Sultanda ótti. Format sheńberindegi yntymaqtastyqtyń negizgi baǵyttary saıası dıalog, óńirishilik yntymaqtastyqty damytý, bıznesti kótermeleý, zııatkerlik dıalog, mádenı baılanystar men adamı almasý bolyp tabylady. Dıalog aıasynda Syrtqy ister mınıstrleriniń kezekti 8-shi keńesin Tokıoda 2021 jyly ótkizý josparlanyp otyr.