OA elderi jáne Qytaıdyń syrtqy ister mınıstrleri Aqparattyq kommıýnıke qabyldady

SIANЬ. QazAqparat - QR Premer-Mınıstriniń orynbasary – Syrtqy ister mınıstri Murat Nurtileý bastaǵan qazaqstandyq delegatsııa «Ortalyq Azııa – Qytaı» formatyndaǵy Syrtqy ister mınıstrleriniń 4-shi keńesiniń jumysyna qatysty. QazAqparat bul týraly QR SІM-ge silteme jasap habarlaıdy.

Mınıstrlik kezdesýine qatysýshylar kún tártibine sáıkes mamyr aıynda Sıan qalasynda ótetin «Ortalyq Azııa – Qytaı» alǵashqy Sammıtine daıyndyq máselelerin, osy dıalog formatyna qatysýshy memleketter arasyndaǵy túrli baǵyttar boıynsha odan ári ózara is-qımyldyń perspektıvalary men kontýrlaryn talqylady, sondaı-aq ózekti halyqaralyq máseleler boıynsha pikir almasty.

Mınıstr M. Nurtileý óz sózinde saýdany arttyrý, eksporttyq taýarlar nomenklatýrasyn keńeıtý, kólik ınfraqurylymyn jetildirý, azyq-túlik qaýipsizdigi salasyndaǵy ózara is-qımyldy nyǵaıtý, sý máseleleri boıynsha yntymaqtastyqty jolǵa qoıý jónindegi kúsh-jigerdi biriktirý, mádenı-gýmanıtarlyq yntymaqtastyqty keńeıtý jáne Ortalyq Azııa men Qytaı arasyndaǵy óńirlik qaýipsizdikti qamtamasyz etýdiń mańyzdylyǵyn atap ótti.

«Qazaqstan bizdiń óńirlik dıalogty damytýǵa mańyzdy mán beredi jáne naqty jobalar men baǵdarlamalardy iske asyrý úshin belsendi ózara is-qımyl jasaýǵa daıyn», – dedi M. Nurtileý. «Saýda-ekonomıkalyq yntymaqtastyq ózara tıimdi áriptestiktiń negizgi tirekteriniń biri jáne Ortalyq Azııa elderi Qytaıǵa eksportty údemeli ulǵaıtý úshin jetkilikti áleýetke ıe», – dep qosty M.Nurtileý.

Ortalyq Azııa elderi jáne QHR arasynda 2022 jylǵy 70 mlrd AQSh dollary deńgeıindegi taýar aınalymynyń josparly kórsetkishterine merziminen buryn qol jetkizilgeni jáne bul qolda bar áleýetti aıǵaqtaıtyny atalyp ótti. Osy rette Qazaqstan men Qytaı arasyndaǵy taýar aınalymy 2022 jyly 24 mlrd AQSh dollarynan asty, bul 2021 jylmen salystyrǵanda 34% kóp ekeni aıtyldy.

Keńes qorytyndysy boıynsha Ortalyq Azııa memleketteri men Qytaı syrtqy ister mınıstrleriniń Aqparattyq kommıýnıkesi qabyldandy.

«Ortalyq Azııa – Qytaı» formatyn qurý Qytaı tarapynyń bastamasy. Osy format sheńberindegi yntymaqtastyqtyń basty maqsaty – saıası-dıplomatııalyq ózara is-qımyl tetikterin jetildirý, saýda, ınvestıtsııalar, kólik, densaýlyq saqtaý, ǵylym jáne joǵary tehnologııalar, qorshaǵan ortany qorǵaý jáne mádenıet salalaryndaǵy yntymaqtastyqty nyǵaıtý.