O.Súleımenov TMD Túrkitanýshylary odaǵyn qurýǵa nıetti

ASTANA. QazAqparat - Ázerbaıjannyń Minval agenttigine suhbat bergen elimizdiń tanymal qoǵam jáne memleket qaıratkeri, aqyn Oljas Súleımenov TMD Túrkitanýshylary odaǵyn qurýǵa nıetti ekendigin aıtty.

«Astanada Nursultan Nazarbaevtyń bastamasymen Túrki akademııasy quryldy. Ol eki-úsh jyldan beri is-qımylǵa talpynǵanymen ony qalaı bastaý kerektigin bilmeıdi. Men onyń janynda TMD Túrkitanýshylary odaǵyn qurýǵa ári aǵymdaǵy jyldyń qyrkúıeginde alǵashqy kezdesýin ótkizip, Túrki akademııasynyń baǵdarlamasyn ázirleýge tyrysýdamyn», - dedi O.Súleımenov.

Sonymen qatar ol KSRO kúıregennen keıin is júzinde toqyraýǵa ushyraǵan túrkitanýshylar ǵylymyn birlese otyryp qaıta jańǵyrtý qajettigin basa aıtty. «Aınalyp kelgende túrki, slavıan grammatıkasy men 1001 sózdiń jalpy shyǵý tegin túsinýge múmkindik beretin Túrki-slavıantaný ınstıtýtyn qurýǵa da kún keler», - dedi ol.