O.Súleımenov Ázerbaıjan prezıdentiniń qurmet dıplomymen marapattaldy (FOTO)

ASTANA. QazAqparat - Astanada ótip jatqan «Uly dala» gýmanıtarlyq ǵylymdar forýmynda Túrki akademııasy túrkitaný ǵylymyna sińirgen eńbekteri men muralary arqyly halyqtar arasyndaǵy yntymaqtastyqty nyǵaıtyp, mádenı baılanystardy tereńdetkeni úshin birqatar tulǵalardy arnaıy altyn medalmen marapattady.

Atap aıtsaq, 80 jasqa tolǵan qazaqtyń qoǵam qaıratkeri, álemge belgili aqyn, Qazaqstannyń Eńbek eri, jazýshy Oljas Súleımenov, túrkitanýshy ǵalym, Lomonosov atyndaǵy MMÝ Azııa jáne Afrıka elderi ınstıtýtynyń ókili Dmıtrıı Nasılov, kórnekti ǵalym, Qazaqstannyń qoǵam qaıratkeri Ádil Ahmetov pen Ózbekstan Ǵylym akademııasynyń akademıgi, tarıhshy ǵalym Ahmadalı Asqarov Túrki Akademııasynyń altyn medaldaryn keýdelerine taqty.

Osy tulǵalar marapattalyp bitken soń, Ázerbaıjan Respýblıkasynyń Qazaqstan Respýblıkasyndaǵy Tótenshe jáne ókiletti elshisi Rashad Mamedov Oljas Omarulyn sahna tórine qaıta shaqyryp, Ázirbaıjan Prezıdentiniń quttyqtaý haty men qurmet dıplomyn tabystady.

«2016 jyldyń 18 mamyrynda qazaqtyń birtýar uly, túrki álemine ortaq tulǵa Oljas Súleımenov 80 jasqa toldy. 16 mamyr kúni Ázerbaıjan Prezıdenti Ilham Álıev Ázerbaıjan Respýblıkasynyń atynan Oljas Súleımenovti qurmet dıplomymen marapattaý týraly qaýlyǵa qol qoıdy»,-dedi elshi O.Súleımenovti quttyqtaı otyryp.

«1990 jyldyń 20 qańtarynda Bakýge Keńes áskeri kirip, beıbit halyq qaza tapqan kúnniń erteńinde Ázerbaıjannyń zııaly qaýym ókilderi sol kezdegi keńes odaǵy elderindegi áriptesterine málimdeme jasap, búkil álemge Ázerbaıjan halqynyń únin jetkizý úshin Bakýge shaqyrǵan edi. Erteńinde Bakýge jalǵyz adam keldi, ol - Baký halqynyń janynan tabylǵan Oljas Súleımenov edi...», - degen elshi Ázerbaıjan jurty O.Súleımenovtiń erligi men janashyrlyǵyn eshqashan umytpaıtynyn atap ótti.