Ó.Shókeev: «KEGOG» halyqtyq ІRO-ǵa shyǵýǵa daıyn

ASTANA. QazAqparat - «KEGOG» halyqtyq ІRO-ǵa shyǵýǵa daıyn. Bul týraly KTK telearnasynyń «Halyq qyzmetshisi» baǵdarlamasyna suhbat bergen «Samuryq-Qazyna» UÁQ» basqarmasynyń tóraǵasy Ómirzaq Shókeev málim etti.

«ІRO óte mańyzdy baǵdarlama dep sanaımyn. Óıtkeni, tipti on paıyz ǵana aktsııanyń baǵasy ashyq naryqta belgilenýi kompanııanyń aıqyndyǵyn arttyrýǵa septigin tıgizedi», - dedi dedi Ó.Shókeev.

Qor basshysynyń atap ótýinshe, halyqtyq ІRO baǵdarlamasyna shyǵarylǵan «Qaztransoıl» kompanııasynyń aktsııasyn 34 myń jeke tulǵa satyp alǵan. Búginde aktsııalar quny bastapqy qunynan 50 paıyzǵa ósim kórsetken.

«Sondyqtan bul óz qarjyńdy barynsha tıimdi salý dep bilemin. Ekinshi jaǵynan endigi ýaqytta «Qaztransoılda» júrgiziletin barlyq protsesster jarııa bolyp otyr. Bizdiń barlyq kompanııalarda osylaı bolýy tıis. Bizde halyqtyq ІRO boıynsha naqty baǵdarlama bar. Biz jeltoqsanda «KEGOG»-ty shyǵaramyz, barlyq daıyndyq jumystary júrgizildi. Quny men ornalastyrý qurylymyn aıqyndaý ǵana qaldy. Odan keıin bizdiń baǵdarlamamyz boıynsha «Samuryq Energo», «QTJ», «Qazatomónerkásip» kompanııalaryn daıyndaımyz», - dedi ol.