Ó. Shókeev: «QazTransOıl» kompanııasynyń aktsııalaryn satyp alǵan joqpyn

ASTANA. QazAqparat - Jylyna IPO-ǵa bir kompanııadan ótkizgen durys. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte «Samuryq-Qazyna» AQ Basqarma tóraǵasy Ómirzaq Shókeev málim etti.

«Byltyr «Halyqtyq IPO» naryǵyna «QazTransOıl» kompanııasynyń on paıyzyn shyǵardyq. Bul jumystar sátti ótti dep aıtýǵa bolady. Basynda «QazTransOıl» aktsııalary 750 teńgeden satylsa, qazirgi naryqta onyń quny 1 250 teńgege jetti»,-dedi Basqarma tóraǵasy.

Osy oraıda Ó. Shókeev «Halyqtyq IPO» baǵdarlamasy mindetti túrde jalǵasatynyn atap ótti.

Onyń sózine qaraǵanda, bıyl «KEGOC» aktsıonerlik qoǵamy «Halyqtyq IPO» memlekettik baǵdarlamasynyń aıasynda óz aktsııalaryn saýdaǵa shyǵarýdy josparlanyp otyr.

«Kedergi keltirmes úshin IPO-ny jıi ótkizýge bolmaıdy. Jylyna bir kompanııadan ótkizsek durys bolady degen oıdamyn»,-dedi Basqarma tóraǵasy.

Sonymen qatar Ó. Shókeev tilshiler saýalyna jaýap berý kezinde «QazTransOıl» kompanııasynyń aktsııalaryn satyp almaǵandyǵyn jetkizdi.