Nıý-Iorktegi matematıka páninen olımpıada: Qazaqstandyq oqýshylar top jardy

<p>ASTANA. KAZINFORM &mdash; Qazaqstandyq oqýshylar Nıý-Iorkte ótken bedeldi Kopernık halyqaralyq matematıka olımpıadasynda 29 medal jeńip aldy.</p>

Nıý-Iorktegi Kolýmbııa ýnıversıtetinde ótken jarysqa 50-den astam el qatysty.

Qazaqstandyq oqýshylar olımpıadada 29 medal jeńip alyp, erekshe jetistik kórsetti: 2 altyn, 11 kúmis jáne 16 qola.

Qazaqstan quramasy ókilderiniń biri – Nıý-Iorkte kúmis júldeger atanǵan Taraz qalasyndaǵy №53 mekteptiń 4-synyp oqýshysy Qalabaı Abylaı. Ol Amerıka Olımpıadasynyń joǵary deńgeıde ótkenin, el abyroıyn asqaqtatý úshin aldaǵy ýaqytta da osyndaı halyqaralyq jarystarǵa qatysýdy josparlap otyrǵanyn aıtty.

Foto: Rýstem Kojybaev

Abylaıdyń anasy Jansaıa Rahmanqulova bul ulynyń AQSh-qa alǵashqy sapary ekenin aıtty. Abylaı shahmatqa, astronomııaǵa, robototehnıkaǵa qyzyǵýshylyq tanytqanymen, matematıkaǵa bala kezinen qumar. Abylaı — Qazaqstandaǵy barlyq olımpıadalardyń birinshi oryn ıegeri. Anasy ulynyń halyqaralyq olımpıadadaǵy jetistikterin jáne Qazaqstannyń bedelin arttyrýǵa qosqan úlesin maqtan tutady.

Olımpıadanyń kúmis júldegeri Asqar Álmaqtum Taraz qalasyndaǵy fızıka-matematıka baǵytyndaǵy NZM 8-synyp oqýshysy.

Qazaqstan Respýblıkasynyń AQSh-taǵy dıplomatııalyq mekemeleri oqýshylarǵa qoldaý kórsetken ustazdar men ata-analarǵa alǵystaryn bildirdi.

— Qymbatty stýdentter, ǵylymnyń qyzyq álemin tanyp-bilýde aldaǵy jumystaryńyzǵa sáttilik tileımiz! - dedi Qazaqstan Respýblıkasynyń Nıý-Iorktegi Bas konsýldyǵynyń Facebook-tegi paraqshasynda.

Matematıkalyq olımpıada ataqty astronom jáne matematık Nıkolaı Kopernıktiń esimimen atalady. Oqýshylardyń matematıkaǵa degen qyzyǵýshylyǵyn, biliktiligin arttyrýǵa baǵyttalǵan. Kopernık olımpıadasy qatysýshylardy matematıkalyq teorııanyń tereńdigin zertteýge, esepterdi sheshýge jáne shyǵarmashylyq oılaýǵa shaqyrady.