Nıý-Iorkte sý tasqynyna baılanysty TJ jarııalandy

<p>Apta boıy toqtamaı turǵan aqjaýyn Nıý-Iork pen onyń irgesindegi eldi mekenderdi sý astynda qaldyrdy. Qala meri tótenshe jaǵdaı týraly jarııalady, al shtat gýbernatory adam ómirine qaýip bar ekenin málimdedi. Bıylǵy qyrkúıek Nıý-Iorktegi 1882 jyldan bergi eń jańbyrly aı dep tanyldy.&nbsp;<a href="https://kaz.inform.kz/" target="_blank" rel="noopener">QazAqparat</a>&nbsp;bul týraly&nbsp;<a href="https://www.bbc.com/russian/articles/c3gleyx73p3o" target="_blank" rel="noopener">VVS-ge</a>&nbsp;silteme jasap habarlaıdy.</p>

Aı basynan beri jumanyń tańyn qosqanda Nıý-Iorkte 350 mm jýyq jaýyn jaýǵan. Ázirge qala men shtat bıligi tasqyn saldarynan qaza tapqandar men aýyr jaraqat alǵandardy tirkemegenimen, qutqarý qyzmeti sý basqan úı astyndaǵy jaılardan adamdardy alty ret shyǵaryp alǵan.

Nıý-Iork meri Erık Adams mektepterdi jappaý týraly sheshim qabyldady, sebebi oqýshylarǵa qaýip tónip turǵan joq. Degenmen ol qala turǵyndaryn sý basyp qalýy yqtımal jerlerde abaı bolýǵa shaqyrdy.

Nıý-Iork shtatynyń gýbernatory Ketı Hokýl nóser jaýyndy adam ómirine qaýip tóndirýi múmkin dep atap, Nıý-Iork, Long-Aılend pen Hadson-Rıver-Vellı turǵyndaryn táýekel etpeı bıikteý jerlerde bolýǵa shaqyrdy.

Qala polıtsııasy kóptegen joldy tasqynǵa baılanysty jabýǵa týra kelgenin habarlady. Ásirese kópir astynan nemese týnnel arqyly ótetin magıstraldardaǵy qozǵalys shektelgenin aıtty.

Tórt metro jelisi tolyqtaı jabylǵan, al 12 jelide keı beketter jumys istemeıdi nemese keshigip jatyr. Áńgime mıllıondaǵan adam paıdalanatyn negizgi marshrýttar týraly bolyp otyr.

Kýıns aýdanyndaǵy La-Gýardııa áýejaıy A termınaly ýaqytsha jabyq bolatynyn málim etti.

Tańnan beri ushý jolaǵyna 100 mm astam jaýyn-shashyn túsken Djon Kennedı atyndaǵy halyqaralyq áýejaı ákimshiligi aýa raıynyń qolaısyzdyǵyna baılanysty reıster keshigýi, tipti ushpaýy da múmkin ekenin eskertip, jolaýshylardy kesteni aldyn ala tekserip alýǵa shaqyrdy.