Nyǵmatýlın: jańa ǵalamdyq qaýip-qaterler UQShU-nyń aıryqsha nazaryn qajet etedi

ASTANA. QazAqparat - Astanada QR Parlamenti Májilisiniń uıymdastyrýymen «Ortalyq Azııadaǵy yntymaqtastyq pen óńirlik qaýipsizdikti zańnamalyq qamtamasyz etýdegi parlamentterdiń róli» taqyrybynda halyqaralyq dóńgelek ústel otyrysy ótýde, dep habarlaıdy QR Parlamenti Májilisiniń baspasóz qyzmeti.

Oǵan palata Spıkeri Nurlan Nyǵmatýlın qatysyp, sóz sóıledi. Óz sózinde Májilis tóraǵasy mańyzdy jıyndy birlese uıymdastyrýǵa qolǵabys etken Ujymdyq Qaýipsizdik týraly Shart uıymyna rızashylyq bildire kelip, bıyl Ujymdyq Qaýipsizdik týraly Shartqa qol qoıylǵanyna 25 jyl, al Parlamenttik Assambleıanyń qurylǵanyna 10 jyl tolyp otyrǵanyn atap ótti.

Qazaqstan Prezıdenti, Elbasy Nursultan Ábishuly Nazarbaevtyń táýelsizdik alǵan kúnnen bastap, qaýipsizdik pen yntymaqtastyq máselesine erekshe nazar aýdaryp kele jatqanyn, búgingi kúni Qazaqstannyń Ortalyq Azııadaǵy eń turaqty, eń qaýipsiz el ekenin alǵa tartqan Nyǵmatýlın: «Elbasynyń iri bastamalary tek aımaqtarda ǵana emes, álemdik deńgeıde zor qoldaýǵa ıe boldy. Sonyń nátıjesinde, bizdiń elderimiz barlyq salada joǵary strategııalyq áriptestik ornatty. Onyń ishinde, aımaqtyq yntymaqtastyq jáne qaýipsizdik boıynsha da árqashanda jemisti jumys atqaryp keledi. Biraq ta, qazirgi ýaqytta búkil álemde oryn alyp jatqan qaýip-qaterler óte kóp. Bul bizdiń elderimizden áriptestikti burynǵydan da kúsheıtip, birlese áreket etýdi talap etedi»,-dedi.

Spıkerdiń aıtýynsha, osy jolda UQShU Parlamentter Assambleıasyna kiretin elder parlamentteriniń róli óte zor jáne júktelip otyrǵan jaýapkershilik te óte joǵary.

Eske sala ketsek, aǵymdaǵy jyldyń birinshi qańtarynan bastap, Qazaqstan BUU Qaýipsizdik Keńesiniń turaqty emes múshesi retinde resmı túrde jumysqa kiristi. Májilis tóraǵasy atap ótkendeı, Qazaqstan osy kezeńde Ortalyq Azııa boıynsha qaýipsizdik pen turaqtylyqty qamtamasyz etý, aımaqtyq qaýip-qaterler men synaqtarǵa tıimdi qarsy is-qımyl, yntymaqtastyqty nyǵaıtý jáne odan ári tereńdetý baǵytynda belsendi jumystardy qolǵa almaq.

Osy rette Nyǵmatýlın parlamentterdiń ózara áriptestigi ulttyq múddelerdi esepke ala otyryp, halyqaralyq úderisterdi zańnamalyq turǵydan qamtamasyz etýge jol ashatynyn atap ótti. Májilis tóraǵasynyń aıtýynsha, Ortalyq-Azııa óńirinde qaýipsizdikti qorǵaýda Ujymdyq Qaýipsizdik týraly Sharttyń róli óte zor.

«Bul jolda Qazaqstan Parlamenti depýtattarynyń UQShU Parlamenttik Assambleıasy sheńberinde óz áriptesterimen tyǵyz qatynas ornatý óte mańyzdy. Parlamenttik dıplomatııa kóptegen halyqaralyq máseleler boıynsha elderdiń ustanymdaryn alǵa jyljytýǵa jáne taraptardyń múddelerin qozǵaıtyn qujattardyń mazmundyq sıpatyna yqpal ete alady,-dedi Nurlan Nyǵmatýlın.

Aıta keteıik, táýelsizdik jyldarynda Qazaqstan Parlamenti Elbasy Nursultan Ábishuly Nazarbaevtyń ıdeıasymen qurylǵan, bıyl 25 jyl tolyp otyrǵan, qaýipsizdik máselesine etene aralasatyn Azııadaǵy Ózara Yqpaldastyq jáne Senim Sharalary jónindegi Keńes aıasynda kóptegen halyqaralyq sharttardy jáne UQShU sheńberinde 38 halyqaralyq shartty, sondaı-aq, Shanhaı yntymaqtastyq uıymy aıasynda 17 halyqaralyq shartty ratıfıtsııalaǵan.

Mańyzdy forýmǵa UQShU Parlamenttik Assambleıasyna múshe-memleketter parlamentteriniń ókilderi jáne Aýǵanstan sondaı-aq, halyqaralyq sarapshylar qatysyp, parlamentaralyq ózara is-qımyldy nyǵaıtýdyń jáne qarym-qatynasty tereńdetýdiń ózekti suraqtaryn talqylaýda.