Nyǵmatýlın: Túrkistan deklaratsııasy Parlament ókilderiniń yntymaqtastyǵyn damytýǵa yqpal etedi

NUR-SULTAN. QazAqparat - Túrkitildes elderdiń Parlament ókilderi zamanaýı jahandyq syn-qaterleri aıasynda barlyq máseleler boıynsha ózara is-qımyldy kúsheıtýge nıetti. Bul túrkitildes elder Parlamenttik Assambleıasynyń H plenarlyq otyrysynyń qorytyndysy boıynsha qabyldanǵan Túrkistan deklaratsııasynda kórinis tapty, dep habarlaıdy QazAqparat tómengi palatanyń baspasóz qyzmetine silteme jasap.

Májilis Tóraǵasy Nurlan Nyǵmatýlın atap ótkendeı, bul tarıhı qujat qol jetkizilgen nátıjelerdi bekitip qana qoımaı, bolashaqqa degen josparlardy da kórsetedi.

Májilis Tóraǵasy qasıetti qara shańyraq, búkil «Túrki áleminiń rýhanı astanasy» kıeli Túrkistan jerine kelip, mańyzdy jıynǵa qatysqandary úshin shyn júrekten alǵysyn bildirdi. Sondaı-aq, TúrkPA-nyń mereıtoılyq sharalary baýyrlas elder arasyndaǵy saıası, ekonomıkalyq, áleýmettik jáne mádenı baılanystardy parlamenttik deńgeıde odan ári nyǵaıtýǵa arnalǵanyn málim etti.

Palata spıkeriniń aıtýynsha, Túrkistan deklaratsııasy bul tarıhı qujat búkil túrki elderiniń Atajurty, rýhanı Astanasy kıeli Túrkistan jerinde qabyldanǵany elderimiz arasyndaǵy dostyqqa, týystyqqa, syılastyqqa jańa serpin beredi.

Nurlan Nyǵmatýlın atap ótkendeı, Túrkistan deklaratsııasy TúrkPA-nyń negizin qalaýshy, Qazaqstan Respýblıkasynyń Tuńǵysh Prezıdenti, Elbasy Nursultan Ábishuly Nazarbaevtyń teńdessiz joǵary rólin baǵalap, tarıhı úlesin erekshe kórsetti.

- Endi múshe elderimizdiń barlyq sala boıynsha yntymaqtastyǵyn nyǵaıtý, uıymnyń halyqaralyq mártebesin kúsheıtý, túrki elder birligin tereńdetý - osynyń barlyǵy aldaǵy bir jyldyń ishinde bizdiń jumystarymyzdyń eń mańyzdy baǵyttary bolady. Jáne muragerlikti saqtap, TúrkPA-ǵa múshe memleketter aıasyn keńeıtýge de basa nazar aýdaratyn bolamyz, - dedi Palata spıkeri.

Sondaı-aq, Nurlan Nyǵmatýlın osy jıynda biz alǵash ret elektrondyq saýda, energetıkalyq resýrstardy tıimdi paıdalaný jáne energetıkalyq tıimdilik, kınematografııa máseleleri boıynsha halyqaralyq modeldik zańdar qabyldaǵanyn atap ótip, osynyń barlyǵy, bizdiń Assambleıa jumysyna jańa serpin beretinine senim bildirdi.

Palata Tóraǵasy Ázerbaıjannan, Qyrǵyzstannan, Túrkııadan, Majarstannan, Ózbekstannan kelgen áriptesterine, barsha halyqaralyq uıym múshelerine birlesken tabysty jumys úshin alǵys bildirdi.

Іs-shara barysynda Ázerbaıjan Respýblıkasy Mıllı Medjlısiniń Tóraıymy Sahıba Gafarova, Qyrǵyz Respýblıkasy Jogorký Keneshiniń Tóraǵasy Talant Mamytov, Túrkııa Respýblıkasy Uly Ulttyq Jınalysynyń Tóraǵasy Mustafa Shentop sóz sóıledi.

Aıta ketý kerek, Túrkistan deklaratsııasynyń mańyzdy tarmaqtary Elbasynyń tarıhı rólin bekitý, elimizdegi Prezıdenttik saıası reformalar paketin qoldaý, qaýipsizdikti nyǵaıtý, COVID-19 pandemııasynyń saldarymen kúreske arnaldy.