Nyǵmatýlın: Prezıdent áleýmettik qoldaýlarǵa jáne daǵdarysqa qarsy sharalarǵa erekshe nazar aýdaryp otyr

NUR-SULTAN. QazAqparat –QR Parlamenti Májilisiniń tóraǵasy Nurlan Nyǵmatýlın Táýelsizdiktiń 30 jyldyǵyna arnalǵan halyqaralyq konferentsııada Elbasy men Prezıdent arasyndaǵy sabaqtastyq tájirıbesi týraly pikir bildirdi, dep habarlaıdy QazAqparat tilshisi.

«Biz tilimizdi, dinimizdi, tarıhymyzdy saqtaı otyryp, uly maqsatty alǵa qoıǵan jáne soǵan jetken, óziniń qazaqstandyq joly qalyptasqan berekeli elmiz. Bul joldy árbir azamat «Nursultannyń nurly joly» dep maqtaıdy jáne qurmetteıdi. Sebebi Elbasymyz Nursultan Ábishuly Nazarbaev 30 jyldyń ishinde ekonomıkasy myqty, qoǵamy turaqty, halqy tatý, mártebesi bıik, táýelsiz Qazaqstannyń irgetasyn qalady», - degen Nurlan Nyǵmatýlın sol irgetasty qazirgi Prezıdent Qasym-Jomart Toqaev bekite túsetinine senim bildirdi.

«Bul irgetasty odan ári nyǵaıtý úshin Memleket basshysy Qasym-Jomart Kemeluly Toqaev saıası, áleýmettik, ekonomıkalyq reformalardy qolǵa alyp, naqty strategııalyq mindetter qoıdy. Bir el bolyp, bir halyq bolyp osy alǵa qoıǵan maqsattarymyzǵa abyroımen jetemiz dep senemiz.

Qazirdiń ózinde Prezıdentimiz eń aldymen áleýmettik qoldaýlarǵa jáne daǵdarysqa qarsy sharalarǵa erekshe nazar aýdaryp, elimizdegi basqa da barlyq salalar boıynsha naqty qadamdar jasaýda. Osynyń bári abyroıy asqaq, bedeli zor memleketimizdi odan ári kórkeıtip, jarqyn bolashaqqa, kemel keleshekke jetkizetini sózsiz», - dedi QR Parlamenti Májilisiniń tóraǵasy.