Nyǵmatýlın: Parlament Elbasy júktegen mindetterdiń oryndalýyna belsene qatysady

ASTANA. QazAqparat - Parlament Májilisiniń Tóraǵasy Nurlan Nyǵmatýlın jumys saparymen Qostanaıǵa keldi, dep habarlaıdy Májilistiń baspasóz qyzmeti.

Palata Spıkeri eń áýeli elimizdiń mashına óndirisine eleýli úles qosyp kele jatqan «SaryarqaAvtoProm» JShS-niń búgingi tynys-tirshiligimen tanysty. Kásiporyn qyzmetkerleri aldynda sóz sóılegen N. Nyǵmatýlın elimizdiń 25 jyl ishinde jetken jetistikterin alǵa tarta kelip, oǵan qazynasy mol, áleýmettik-ekonomıkalyq qýaty zor, elimizdegi   eń iri astyqty ortalyq - Qostanaı oblysynyń qosyp jatqan úlesine de toqtaldy.  Aımaqta el ıgiligi úshin eńbek etip júrgen, dıhandar da, kenshiler de, metallýrgter de bar ekenin sóz etken Májilis Spıkeri óz sózinde árbir otbasynyń, árbir shańyraqtyń dastarhanyn toltyryp, birligi men berekesin jarastyratyn qasıetti nannyń ordasy da osy Qostanaı ekenin alǵa tartty.

Májilis Tóraǵasy atap ótkendeı, táýelsizdiktiń alǵashqy jyldarynda oblysta shyǵatyn ónim kólemi 10 mıllıon teńgeni qurasa, qazir bul kórsetkish 443 mıllıard teńgege jetip otyr.

Al, Saryarqa avtoprom kásiporny 600-den astam azamatty jumyspen qamtyp, jylyna 1500 avtokólik shyǵaratyn deńgeıge jetken.

Eksportqa shyǵarylatyn Qazaqstandaǵy tórt túrli mashınanyń úsheýi osy «SaryArqaAvtoProm» zaýytynda jasalady. 

Májilis Tóraǵasy sondaı-aq, elimizde júzege asyrylyp jatqan Prezıdentimizdiń «Qazaqstan - 2050» damý baǵdarlamasy men «100 naqty qadam» Ult josparynyń oryndalý barysyn da nazardan tys qaldyrmady.

Osy oraıda Májiliste atqarylyp jatqan jumystarǵa keńinen toqtalyp, mańyzdy zań jobalary tóńireginde tuşymdy áńgime qozǵady.    

Kásiporyn qyzmetkerleri Májilis Spıkerine elimizdiń áleýmettik, -ekonomıkalyq, saıası ómirine qatysty ózderin tolǵandyrǵan suraqtaryn qoıyp, pikir almasty.

- Bizdiń kezdesýler elimizdiń jańa damý belesi bastalǵan  mańyzdy kezeńde ótip jatyr. Sondyqtan, saılaýshylarǵa Elbasymyz Nursultan Ábishuly Nazarbaev alǵa qoıǵan negizgi  mindetter týraly   aıtyldy.  Ásirese, turǵyn úı,   densaýlyq, eńbek salalaryna  jáne olardy zań jaǵynan qoldaýǵa   kóńil bólindi. Osy jolda aıtylǵan  barlyq usynystarǵa, pikirlerge aldaǵy zań shyǵarý jumysynda erekshe nazar aýdarylady,-dep atap ótti Nurlan Nyǵmatýlın.