Nyǵmatýlın «Nazarbaev modeliniń» qupııasyn ashty

ASTANA. QazAqparat - Elordada Qazaqstannyń jańǵyrý modeline arnalǵan xalyqaralyq konferentsııa bastaldy. Sharaǵa qatysqan QR Parlamenti Májilisiniń tóraǵasy Nurlan Nyǵmatýlın "Nazarbaev modeliniń" negizgi erekshelikterin aıtyp berdi, dep xabarlaıdy QazAqparat tilshisi.

"Birinshiden, Qazaqstandaǵy barlyq reformalardyń avtory bir, ol - Tuńǵysh Prezıdentimiz Nursultan Nazarbaev. Sonyń arqasynda barlyq bastamalardy júıeli túrde iske asyrýǵa múmkindik bar. Memleket basshysy elimizdegi kúrdeli reformalardyń basty ıdeology bolyp sanalady. Prezıdenttiń jyl saıynǵy Joldaýlary el ekonomıkasyn reformalaýǵa, qoǵamnyń rýxanı jańǵyrýyna, ultaralyq jáne konfessııaaralyq kelisim modelin qalyptastyrýǵa, jalpy eldiń jańarýyna jol ashty. Negizi, jańǵyrýdyń qazaqstandyq modelin "Nazarbaev modeli" dep ataǵan durys bolar edi. 25 jylda bolǵan reformalardyń nátıjesi men odan jınaqtaǵan tájirıbemiz sonyń aıqyn dáleli bolsa kerek", - deıdi Nurlan Nyǵmatýlın.

Májilis tóraǵasynyń paıymynsha, jańǵyrý sharalaryn úzdiksiz júrgizý «Nazarbaev modeliniń» taǵy bir ereksheligi bolyp sanalady. Osy ýaqytqa deıin barlyq sharalar júıeli túrde birinen soń biri qolǵa alynyp keledi. Al "aldymen - ekonomıka, odan keıin - saıasat" degen ustanym KSRO-nyń taralýynan keıingi qıynshylyqtan súrinbeı ótýge kómektesti.

"Sonyń arqasynda 1997 jyly "Qazaqstan - 2030" strategııasyn iske asyrýǵa kiristik. Atalǵan qujattyń maqsat-mindetterin aldyn ala oryndap, "Qazaqstan - 2050" strategııasyna bet aldyq. Endi, Qazaqstannyń úshinshi jańǵyrýyna arnalǵan úlken bastamany qolǵa alyp otyrmyz. Osylaısha, Prezıdentimiz bir maqsatqa jetkennen keıin ózin de, xalqyn da kelesi mindetterge jumyldyryp otyrady", - dep atap kórsetti Nurlan Zaırollauly.

Onyń aıtýynsha, Qazaqstandy tsıfrlandyrý men rýxanı jańǵyrý xalyqty áli de úlken jetistikterge jeteleıdi. Al Konstıtýtsııaǵa engizilgen ózgerister sonyń barlyǵyn iske asyrýǵa óz septigin tıgizedi.

Aıta keteıik, "Jańa jahandyq bolmystaǵy Qazaqstannyń jańǵyrý modeli" taqyrybyndaǵy xalyqaralyq parlamenttik konferentsııa QR Tuńǵysh Prezıdenti kúnine arnalyp otyr. Májiliske Reseı, Ázerbaıjan, Túrkııa, Ózbekstan, Armenııa, Italııa, Ispanııa, Qytaı, Birikken Arab Ámirlikteri, Bolgarııa, Majarstan jáne taǵy basqa, barlyǵy 15 eldiń delegattary qatysýda. Budan bólek, AQSh-tyń sarapshylary da keldi.