Nyǵmatýlın: bıýdjettiń tıimdiligi ǵana el basshylyǵynyń tapsyrmalaryn oryndaýǵa múmkindik beredi

NUR-SULTAN. QazAqparat - Búgin Palata spıkeri Nurlan Nyǵmatýlınniń tóraǵalyǵymen ótken jalpy otyrysta Úkimet pen Esep komıtetiniń 2020 jylǵa arnalǵan esepteri tyńdaldy, dep habarlaıdy QazAqparat Májilistiń baspasóz qyzmetine silteme jasap.

Onda Májilis tóraǵasy respýblıkalyq bıýdjetti ıgerýdiń ózekti máselelerine toqtalyp:

- Byltyrdan beri elimizde qalyptasqan jaǵdaı barshańyzǵa belgili. Búkil álemdi qamtyǵan koronovırýs pandemııasy bizdiń ómirimizge de kóptegen ózgerister alyp keldi. Biraq ta, elimizdi damytý, halqymyzdy qorǵaý jolyndaǵy maqsattar, mindetter, jumystar bir kúnge de toqtaǵan joq. Sondyqtan, áleýmettik-ekonomıkalyq turaqtylyqty saqtaýǵa qatysty jumystar der kezinde qolǵa alyndy, - dedi.

Nurlan Nyǵmatýlın halyqty qoldaý úshin daǵdarysqa qarsy sharalar qabyldanǵanyn, ol qarajattar barlyq áleýmettik mindettemelerdi júzege asyrýǵa jáne otandyq ekonomıkany qoldaýǵa yqpal etkenin aıtty. Máselen, atalǵan kezeńde Ulttyq qordan kepildendirilgen transfert retinde 4,8 trıllıon teńge bólingen.

Úkimet qabyldaǵan daǵdarysqa qarsy sharalar elimiz boıynsha jumyssyzdyqty 4,9% deńgeıinen asyrmaýǵa jáne ortasha aılyq jalaqyny 7,3% - ǵa ulǵaıtýǵa jol ashty. Aýyl sharýashylyǵy óndirisiniń ósimi 5,6% qurady.

Alaıda, Nurlan Nyǵmatýlın bıýdjettiń oryndalýynda áli oryn alǵan kemshilikter baryn alǵa tarta kelip, memleket qarajatyn utymdy, nátıjeli jáne tıimdi ıgerý kerektigine basa nazar aýdardy.

Sonymen qatar otyrys barysynda halyqty ýaqytsha jumyspen qamtý sharalaryna qatysty birqatar máseleler basty nazarda boldy.

Esep komıtetiniń qorytyndysy boıynsha «Jumyspen qamtýdyń jol kartasy» aıasynda 2020 jyly 239 myń adam jumysqa ornalastyrylǵan.

Alaıda, jobalardyń qysqa merzimdiligine baılanysty qazirdiń ózinde 158 myń adam jumystan bosatyldy. Al jumysqa ornalasqandardyń 17%-y bir aı ǵana jumys istegen.

Osy rette, Nurlan Nyǵmatýlın bul bar-joǵy 4,5 paıyz ǵana qurap otyrǵanyn alǵa tarta kelip:

- Áıteýir «eki qolǵa bir kúrek»,- dep, ýaqytsha jumysqa alyp baramyz.

Biraq ta, ony turaqty sheshim dep aıtýǵa bolmaıdy. Sebebi, qalǵan ýaqytta, mysaly, kúzde, qysta ne isteıdi? Ol kezde de jumys isteý kerek qoı, ol kezde de otbasyn asyraý kerek qoı, - dedi.

Palata spıkeriniń pikirinshe, halyqty turaqty, tıimdi, sapaly eńbekpen qamtamasyz etý kerek. Bul jumys esep berý úshin, baıandama úshin emes, shyn máninde, halyqtyń jaǵdaıyn jaqsartý úshin qajet.

Osyǵan oraı, Májilis tóraǵasy áleýmettik qorǵaý mınıstrine atalǵan máselelerge ásirese, turaqty jumystarǵa erekshe nazar aýdarý qajettigin eskerte otyryp, osy jumysty durys uıymdastyrý kerektigin aıtty.