Nyǵmatýlın: aýyldarda jańa feldsherlik-akýsherlik beketterdi salýdy jedeldetý qajet

NUR-SULTAN. QazAqparat – Májilis tóraǵasy Nurlan Nyǵmatýlın úshjyldyq bıýdjet jobasynda kózdelgen semınarlar men sımpozıýmdarǵa jumsalatyn shyǵyndardy qysqartýǵa, al únemdelgen qarajatty áleýmettik qajettilikterge qaıta bólýge bolady dep esepteıdi. Bul týraly QazAqparat tómengi palatanyń baspasóz qyzmetine silteme jasap habarlaıdy.

Osy máseleni Palata spıkeri, Májilistegi «Nur Otan» fraktsııasynyń jetekshisi Nurlan Nyǵmatýlın 2021-2023 jyldarǵa arnalǵan respýblıkalyq bıýdjet jobasyn fraktsııa otyrysynda aldyn ala talqylaý barysynda jumys tobyna múddeli memlekettik organdarmen birlesip pysyqtaýdy tapsyrdy.

- Bıýdjetti qaraý barysynda biz onyń Tuńǵysh Prezıdent, Elbasy, «Nur Otan» partııasynyń kóshbasshysy Nursultan Ábishuly Nazarbaevtyń jáne Memleket basshysy Qasym-Jomart Toqaevtyń alǵa qoıǵan mindetteriniń tolyq kólemde sheshilýine qol jetkizýimiz kerek. Bul rette biz koronavırýs pandemııasy saldarynan álemdik ekonomıkada qalyptasqan qazirgi kúrdeli jaǵdaıdy negizge alýǵa tıispiz. Úsh jyldyq bıýdjet dál osy jaǵdaılardy eskere otyryp qalyptastyrylýy tıis, - dep atap ótti Nurlan Nyǵmatýlın.

Osyǵan baılanysty depýtattar qarajattyń bir bóligin asa mańyzdy baǵyttarǵa qaıta bólýdi usyndy.

Atap aıtqanda, bul konsaltıngtik qyzmetterge, sondaı-aq ártúrli semınarlar, konferentsııalar, sımpozıýmdar ótkizýge bólingen qarajattarǵa qatysty.

Zertteýler men konsaltıngtik qyzmetterdiń bir bóligi shyn máninde qajet ekendigimen kelise otyryp, Májilis tóraǵasy qazirgi zamanǵy baılanys quraldary, atap aıtqanda, beınekonferentsııa formaty kóptegen is-sharalardy, sonyń ishinde halyqaralyq is-sharalardy kóp shyǵynsyz tıimdi ótkizýge múmkindik beretinine toqtaldy.

- Semınarlar men sımpozıýmdardy jáne basqa da is-sharalardy ótkizýdi qalyptasqan jaǵdaı turaqtanǵanǵa deıin shegerýge bolady. Qarajattardy neǵurlym mańyzdy áleýmettik jobalarǵa bólýdi qarastyrý qajet, - dedi Nurlan Nyǵmatýlın.

Depýtattar Memleket basshysynyń tapsyrmasyn oryndaýǵa úsh jyl ishinde aýyldy feldsherlik-akýsherlik pýnktter men dárigerlik ambýlatorııalarmen qamtamasyz etý máselesin kóterdi. Depýtattardyń alańdaýshylyǵyn áli kúnge deıin osyndaı medıtsınalyq pýnktterge óńirlerdiń naqty qajettilikteri týraly derekterdiń joqtyǵy týyndatyp otyr. Al qarastyrylyp otyrǵan úsh jyldyq bıýdjette osyndaı tarmaqtardy qurý úshin naqty qarjylyq usynystar joq.

Májilis spıkeri aýyldarda jańa feldsherlik-akýsherlik pýnktter salýdy jedeldetý qajettigin atap ótip, bul maqsattarǵa qarajat kózdelýi tıis ekenin aıtty.

Nurlan Nyǵmatýlınniń pikirinshe, Kvazımemlekettik sektormen ıgerilmegen jáne qazynashylyq shottarda jatqan qarajattyń bir bóligin osy baǵytqa qaıta bólýge bolady.

Qazynashylyq shottarda 78 mlrd teńgeden astam qarajat bar. Májilis depýtattary atap ótkendeı, bul aqsha ekonomıkaǵa jumys istemeıdi jáne bıýdjettiń kiris bóligin tolyqtyrmaıdy.

Sonymen qatar Májilistegi «Nur Otan» fraktsııasynyń otyrysynda bıýdjet jobasyn talqylaý barysynda depýtattar aýyldy sýmen qamtamasyz etý jobalaryn qarjylandyrý úshin de shyǵystardy ulǵaıtýdy usyndy.

Májilis spıkeriniń pikirinshe, aýyldardy aýyz sýmen qamtamasyz etý bıýdjet basymdyqtarynyń biri bolýǵa tıis.

- Árbir problemanyń artynda azamattarymyz turǵanyn este saqtaý qajet. Májilistiń jalpy otyrysynda úshjyldyq bıýdjet jobasy qaralǵanǵa deıin osy aıtylǵan olqylyqtardyń ornyn toltyrý kerek. «Nur Otan» fraktsııa jumysynyń basymdyǵy partııa Kóshbasshysy, Elbasynyń jáne Memleket basshysynyń, sondaı-aq partııanyń saılaýaldy tuǵyrnamasynyń tapsyrmalaryn zańnamalyq qamtamasyz etý. Munyń bári azamattarymyzdyń ómir súrý sapasyn jaqsartýǵa baǵyttalǵan, - dep túıindedi sózin Májilis Tóraǵasy.