Nurjan Nurjigitov sý tarıfine qatysty túsinik berdi
«1 qańtardan bastap egistikterge arnalǵan sýdyń ortasha ólshengen tarıfi 1 teńgege ósedi. Biz aýyz sý tarıfterin kóterý máselesin qarastyryp jatqan joqpyz», - dedi Nurjan Nurjigitov Senattyń jalpy otyrysynan keıin tilshiler suraǵyna jaýap bere otyryp.
Bul turǵyda mınıstr sý únemdeý baǵytynda josparlanǵan is-sharalarǵa toqtaldy.
«Jalpy, sý resýrstary týraly aıtatyn bolsaq, Qazaqstanda jyl saıyn 100 tekshe shaqyrymnan astam sý jınalady. Onyń 54 paıyzy Qazaqstan aýmaǵynan, 46 paıyzyn transshekaralyq ózenderden alamyz. Bul negizinen ońtústik, shyǵys jáne batys aımaqtar. Qazir biz 25 tekshe shaqyrym sýdy paıdalanamyz, onyń 65 paıyzy aýyl sharýashylyǵyna, 25 paıyzy ónerkásipke jáne 5 paıyzdan sál astamy kommýnaldyq-turmystyq salaǵa baǵyttalady. Sýdyń jetispeýi máselesine qatysty kóp aıtylyp júr. Sý tapshylyǵyn boldyrmaý úshin mınıstrlik ár oblyspen birlese jańa sý qoımalaryn salý, jumys istep turǵan gıdrotehnıkalyq nysandardy qalpyna keltirý, sýarý júıelerin jóndeý, aýyl sharýashylyǵyndaǵy sý únemdeý tehnologııalarynyń úlesin ulǵaıtý turǵysynda keshendi jospardy ázirledi. Bul is-qımyldar 2030 jylǵa qaraı 10 myń tekshe shaqyrymǵa deıin sýdy jınaqtap, únemdeýge múmkindik beredi», - dedi Nurjan Nurjigitov.