Nurjan Nurjigitov fermerlerdi sý únemdeýge yntalandyrý joldaryn atady
«Qolda bar sý resýrstaryn utymdy paıdalaný «resýrstardy basqarýdan» «suranysty basqarýǵa» kóshýge múmkindik beredi. Onyń negizgi qaǵıdaty - sý qabyldaý kólemin ulǵaıtpaı ekonomıka salalarynyń ósip kele jatqan qajettilikterin paıdalaný. Transshekaralyq ózender arqyly aǵynnyń azaıý qaýpin, sondaı-aq sýarý kanaldarynda úlken shyǵyndardyń bolýyn eskere otyryp, fermerlerdiń sý únemdeý tehnologııalaryn engizý boıynsha birlesken jáne keshendi jumystar júrgizý qajet», - dedi Nurjan Nurjigitov.
Máselen, mınıstrdiń dereginshe, búgingi tańda sýarmaly jerlerdiń 1,9 mln gektarynyń tek 16 paıyzynda ǵana sý únemdeý tehnologııasy qoldanylady. Bul qazirgi jaǵdaıda óte qolaısyz.
«Fermerlerdi sý únemdeý tehnologııalaryn qoldanýǵa yntalandyrý maqsatynda Aýyl sharýashylyǵy mınıstrligimen birlesip, sýarý júıelerin qurýǵa, tamshylatyp jáne jańbyrlatyp sýarý jabdyqtaryn satyp alýǵa arnalǵan shyǵystardy sýbsıdııalaý úlesin 50-den 80 paıyzǵa deıin ulǵaıtý boıynsha jumystar bastaldy. Bul rette sý únemdeý tehnologııalaryn qoldaný 2030 jylǵa qaraı sýarmaly jerlerdiń alańdaryn 1,3 mln gektarǵa deıin jetkizýge yqpal etedi. Qazaq sý sharýashylyǵy ǵylymı-zertteý ınstıtýtynyń baǵalaýy boıynsha bul shara shamamen 2,1 tekshe shaqyrym sýdy únemdeýge, sondaı-aq aýyl sharýashylyǵy óniminiń ónimdiligin 1,5-2,0 esege arttyrýǵa múmkindik beredi», - dedi ol.
Onyń atap ótýinshe, klımattyń ózgerýine baılanysty sýdy tutynýdyń úlestik normalarynyń ulǵaıýynyń teris úrdisi baıqalady. Bul daqyldardyń sý tutyný normatıvteriniń ulǵaıýyna áser etedi.
«Tujyrymdama jobasynda qolda bar sý resýrstarynyń kólemin ekologııalyq jáne ekonomıkalyq ońtaıly deńgeıde ustap turý maqsatynda sý qoryn qorǵaý jáne paıdalaný salasyndaǵy eń úzdik tehnologııalardyń tizbesin, sý paıdalaný lımıtterin belgileýdiń jańa tetikterin, aınalymdy jáne qaıta sýmen jabdyqtaýǵa kóshý josparlaryn ázirleý jáne qabyldaý boıynsha sharalar kózdeletin bolady», - dedi Nurjan Nurjigitov.