Nurjan Áshimbetov Pavlodar qalasynyń ákimi bolyp taǵaıyndaldy

ASTANA. QazAqparat - Pavlodar oblys ákiminiń aýyl sharýashylyǵy máseleleri jónindegi orynbasary qyzmetin atqarǵan Nurjan Áshimbetov oblys ortalyǵynyń ákimi bolyp taǵaıyndaldy, dep habarlaıdy pavlodarnews.kz.

Aımaq basshysy Bolat Baqaýov Nurjan Áshimbetovke óńirdiń aýyl sharýashylyǵy salasynyń damýyna qosqan zor úlesine rızashylyǵyn bildirip,  jańa jumysyna sáttilik tiledi.   

Ol 1969 jyly Pavlodar oblysy Lebıaji aýdany Chernoe aýylynda týǵan. Zooınjener mamandyǵy boıynsha Almaty zooveterınarlyq ınstıtýtyn jáne býhgalter-ekonomıst mamandyǵy boıynsha Almaty ekonomıka jáne statıstıka ınstıtýtyn támamdaǵan.

Eńbek jolyn Memlekettik múlik jónindegi Pavlodar aýmaqtyq komıtetiniń mamany bolyp bastap, keıin halyqaralyq damý jónindegi amerıkalyq agenttikke qarasty «Karana» korporatsııasynyń keńesshisi qyzmetin atqarady. 1997-1999 jyldar aralyǵynda - Lebıaji aýdanyndaǵy óndiristik kooperatıv tóraǵasy, agrofırma dırektory;

1999-2008 jyldar aralyǵynda - Aqtoǵaı aýdany ákiminiń orynbasary, Lebıaji aýdanynyń ákimi, Pavlodar oblysy aýyl sharýashylyq basqarmasynyń bastyǵy;

2008-2009 jyldary - QR Prezıdenti Ákimshiliginiń memlekettik ınspektory; 2009-2012 jyldary Petropavl qalasynyń ákimi qyzmetin atqardy. 2012 jylǵy 1 aqpanda Pavlodar oblys ákiminiń aýyl sharýashylyǵy jónindegi orynbasary bolyp taǵaıyndaldy.