Nurjan Áltaevtyń sot otyrysyna prokýror kelmeı qaldy

<p>Májilistiń burynǵy depýtaty, burynǵy Aýyl sharýashylyǵy vıtse-mınıstri jáne burynǵy Eńbek vıtse-mınıstri Nurjan Áltaevqa qatysty sot otyrysy 31 qazanǵa aýystyryldy, dep habarlaıdy <a href="https://kaz.inform.kz/?_gl=1*1cookbu*_ga*MTMxOTQ2NjU5MC4xNjk4Mzc1OTcw*_ga_Y44SMVECD5*MTY5ODM3NTk2OS4xLjAuMTY5ODM3NTk2OS42MC4wLjA.&amp;pk_vid=1dac2fba2c02ff6916983759715aaacc" target="_blank" rel="noopener">Kazinform</a> agenttigi.</p>

Sot otyrysyna prokýror men aıyptalýshynyń ózi kelmegen.

«Nurjan Áltaev 5 aıdan beri qamaýda otyr jáne muny eskerý qajet. Men sottan Qylmystyq is júrgizý kodeksiniń 405-baby boıynsha jeke qaýly shyǵarýdy nemese sebepsiz protseske kelmegen prokýrordy jaýapqa tartýdy suradym. Eger ol sotqa kelmeýi jóninde eshqandaı qujat usynbaǵan bolsa, Ákimshilik kodekstiń 653-baby (Sotty qurmettemeý) boıynsha jaýapqa tartý kerek dep estepteımin». – dedi N. Áltaevtyń qorǵaýshysy Gúlshat Dúısenova.

Advokattyń aıtýynsha, sot protsesi 20 qazanǵa belgilengen edi, alaıda sottyń aýysýy sebepti otyrys 27 qazanǵa ysyrylǵan.

«Búgin prokýrordyń qandaı sebeppen kelmeı qalǵany belgisiz, ıaǵnı Bas prokýratýra prokýrordyń kelýin qamtamasyz ete almady, tipti protseske qandaı prokýrordyń qatysatynyn da aıtqan joq. Eger advokat dál osylaı jasasa, mindetti túrde oǵan qatysty jeke sot sheshimi shyǵarylyp, alqaǵa jiberiletin edi. Meniń oıymsha, sot ta prokýrordyń kelmeıtinin bilgen sekildi, sondyqtan da N. Áltaevty aıdaýylmen ákelgen joq», - dedi ol jýrnalısterge.

Eske sala keteıik, 7 maýsymda Májilistiń eks-depýtaty Nurjan Áltaev para aldy degen kúdikpen ustaldy. Bul aqparatty Sybaılas jemqorlyqqa qarsy is-qımyl agenttigi rastady.

Keıinirek Antıkor Nurjan Áltaevtyń Abylaı Myrzahmetovten aı saıyn 5 myń dollar para alyp otyrǵanyn habarlady.

«Nurjan Áltaev 2018-2019 jyldar aralyǵynda QR Eńbek jáne halyqty áleýmettik qorǵaý vıtse-mınıstri bola tura, júıeli túrde «Atameken» ulttyq kásipkerler palatasynyń basqarma tóraǵasy A.I. Myrzahmetovten para retinde aı saıyn 5 000 AQSh dollary mólsherinde aqsha qarajatyn alyp otyrdy dep kúdiktenedi. Keıinnen Áltaev 2019-2020 jyldar aralyǵynda QR Parlamenti Májilisiniń depýtaty laýazymyn atqara otyryp, Myrzahmetovten para alý boıynsha óziniń sybaılas jemqorlyq qyzmetin jalǵastyrdy. Jalpy alǵanda, ol para retinde 135 000 AQSh dollaryn aldy. Bul asa iri kólem bolyp sanalady», - dep habarlady Antıkor.