Nurymbetov: Jumyssyzdyq deńgeıiniń artýyna jol bermeýge tyrysýdamyz
Onyń sózine qaraǵanda, bıylǵy 8 aıda «JJK-2020» baǵdarlamasyn iske asyrý aıasynda 111,9 myń adam jumyspen qamtýdyń belsendi sharalaryna qatysqanyn málimdedi. Onyń ishinde jumyssyzdar 74,4 myń adam (66,5 %), ózin-ózi jumyspen qamtyǵandar sany 36,2 myń adam (32,4 %) jáne 1 258 adam (1,2%) ishinara jaldamaly jumysshylar bolyp tabylady. Sonymen qatar, 29 jasqa deıingi jastardyń úlesi 47,4 paıyz bolsa, áıelder 45,1 paıyzdy quraıdy.
«2016 jylǵy 1 qyrkúıektegi jaǵdaı boıynsha jumyspen qamtýdyń aımaqtyq keshendi josparlarymen 313 myńnan astam adam qamtylyp, onyń 279,8 myń adamy jumysqa ornalastyryldy. Onyń ishinde turaqty jumys oryndaryna 139,1 myń adam, ýaqytsha jumys oryndaryna 140,7 myń adam turdy»,-dedi B. Nurymbetov.
Onyń aıtýynsha, álemdik ekonomıkada oryn alǵan jaǵdaıǵa baılanysty jáne qyzmetkerlerdi jumystan bosatý qaýpine qaramastan, memleket qabyldap otyrǵan sharalar Qazaqstanda jumyssyzdyq kórsetkishin 5%-dyq deńgeıde ustap otyrýǵa múmkindik berýde.
Budan bólek ol QR DSÁDM Jalpyǵa Ortaq Eńbek Qoǵamy ıdeıasyn halyq arasynda nasıhattaý boıynsha belsendi is-sharalar júzege asyrylyp jatqanyn habarlady. Onyń qatarynda birneshe aýqymdy sharalar bar.
Mınıstrlik málimetinshe, jastar arasynda elimizdiń ekonomıkalyq suranystaryna saı jumysshy kásipter men kásiptik bilim berýdiń bedeli men tanymaldylyǵyn arttyrý maqsatynda aǵymdaǵy jylǵy sáýir aıynan bastap qyrkúıek aıyna deıin jumysshy mamandyqtardyń «Worldskills Kazakhstan» ulttyq jáne óńirlik chempıonattary ótkizildi.
Qazaqstannyń barlyq óńirlerinen kelgen 700-den astam qatysýshylar meıramhanalyq servıs, kondıter isi, shashtaraz isi, jelilik jáne júıelik ákimshilendirý, veb-dızaın, mehatronıka, qurǵaq qurylys jáne sylaqshylar jumysy, kirpish qalaý, dánekerleý jumystary, bezendendirý jumystary, mektepke deıingi tárbıe, kıim dızaıni, elektr montajdyq jumys salalary boıynsha úzdik ataný úshin baıqaýǵa qatysady.
Atap aıtqanda, Jalpyǵa Ortaq Eńbek Qoǵamy ıdeıasyn halyq arasynda nasıhattaý jáne Eńbek adamynyń bedelin arttyrý maqsatynda 2014 jyldan bastap «Eńbek kúni» merekesin atap ótý - mańyzdy sharalardyń biri bolyp tabylady. Elimizdiń barlyq aımaqtarynda Qazaqstan ekonomıkasyn damytýǵa jáne nyǵaıtýǵa óz úlesin qosqan eńbek ardagerlerine, eńbek áýletteriniń ókilderi men kásibı mamandarǵa qurmet kórsetilip, Eńbek kúnine arnalǵan forýmdar ótýde.