Nurtóre Júsip: Balalarǵa arnalǵan qarjy kólemi de ulǵaıa túsedi

<p>ASTANA. KAZINFORM - Senat depýtaty Nurtóre Júsip Ulttyq qordan balalarǵa bólinetin qarjy týraly <a href="https://www.facebook.com/story.php?story_fbid=2453974058136743&amp;id=100005725180008" target="_blank" rel="noopener">Facebook</a> áleýmettik jelisindegi paraǵynda óz oılaryn ortaǵa saldy.</p>

«Prezıdent Qasym-Jomart Toqaev «Ulttyq qor – balalarǵa» degen bastama kóterip, osy maqsatty júzege asyrý úshin quqyqtyq tetikterdi rettep berdi. 2024 jyly Ulttyq qordan osy maqsatqa bólingen qarajattyń jalpy somasy – 695 mıllıon dollar. Bul qarajatty elimizdegi 6 mıllıon 919 myń 131 balaǵa bólgende 100 dollar 50 tsentten keledi eken. Al Ulttyq qor qarajaty kóbeıgen saıyn balalarǵa arnalǵan qarjy kólemi de ulǵaıa túsedi. Búgin arnaıy ashylǵan esepshottarǵa alǵashqy tólem tústi. Bul ata-analardyń erteńgi kúnge degen senimin arttyrady»,-dep jazdy senator.

Senat spıkeri Máýlen Áshimbaev búgin jýrnalısterge bergen suhbatynda Ulttyq qordan balalarǵa túsip jatqan tólem kólemi boıynsha birqatar túsinikteme berdi.

- Biz jyl ótken saıyn Ulttyq qor qarajatyn kóbeıtýge jáne únemdeýge múddeli bolýymyz kerek. Sonda balalarǵa baǵyttalǵan ınvestıtsııalyq tabys kólemi de arta túsedi , - dedi.

Memleket basshysy buǵan deıin aldaǵy ýaqytta ishki jalpy ónim kólemin 2 ese arttyrý týraly aıtqan bolatyn. El ómirindegi naqty ózgerister osylaısha oń nátıje bere bastaıtyny anyq.