Nurtóre Júsip Armenııanyń Qazaqstandaǵy elshisimen kezdesti

<p>ASTANA. KAZINFORM - Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip Armenııa Respýblıkasynyń Qazaqstandaǵy Tótenshe jáne Ókiletti Elshisi Armen Gevondıanmen kezdesti, dep habarlaıdy QR Parlamenti Senatynyń baspasóz qyzmeti.</p>

Senator óz sózinde Qazaqstan men Armenııanyń ekijaqty túrdegi de, birqatar ıntegratsııalyq birlestikter aıasyndaǵy da ózara is-qımylynyń joǵary deńgeıin atap ótti.

«Parlamentaralyq áriptestik ekijaqty yntymaqtastyqtyń jalpy protsesiniń mańyzdy quramdas bóligi bolyp tabylady. Qazaqstan men Armenııa Parlamentterindegi parlamentaralyq dostyq toptary boıynsha qarqyndy qadamdar júzege asýda. Bizdiń parlamentshiler TMD Parlamentaralyq Assambleıasy, EQYU men Eýropa Keńesiniń Parlamenttik Assambleıalary, sondaı-aq Parlamentaralyq Odaq aıasynda da kópjaqty sıpatta tyǵyz baılanysta jumys istep keledi», - dedi Nurtóre Júsip.

Taraptar sonymen qatar týrıstik, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqtyń keleshegin talqylady.

Armen Gevondıan óz kezeginde Armenııa Qazaqstanmen yntymaqtastyqty joǵary baǵalaıtynyn, sondaı-aq ekijaqty qarym-qatynastardy nyǵaıtýǵa belsendi yqpal etýge daıyn ekenin atap ótti.