Nurtóre Júsip: Tynyshtyq pen turaqtylyq - Táýelsizdiktiń tiregi
«Bul zaman - biliktiniń, bilimdiniń zamany. Qazir álem tez ózgerip jatyr. Sana ózgerdi, álemdik saıasat pen ekonomıka da ózgerý ústinde. Kezekten tys Prezıdent saılaýyn ótkizýdi búkil Qazaqstan halqy qoldap otyr. Tynyshtyq pen turaqtylyq - Táýelsizdiktiń tiregi. Saıasattaǵy sabaqtastyq jalǵasýy qajet. Bárimizge beıbit ómir kerek. Jetken jetistikterimizge máz bolmaı, bir orynda turyp qalmaı, alǵa órleý kerek, zamanǵa saı jańarý qajet. Osyndaı jaǵdaıda Prezıdent saılaýyn ótkizýdiń eldik mańyzy óte joǵary. Bárimiz tas-túıin jumylyp, Elbasymyzdyń saralap salyp bergen jolyn jalǵaýymyz qajet!», - dedi N. Júsip QR Tuńǵysh Prezıdenti Nursultan Nazarbaevqa qarata aıtqan sózinde.
Aıta keteıik, búgin QR Tuńǵysh Prezıdenti - Elbasy, «Nur Otan» partııasynyń Tóraǵasy Nursultan Nazarbaevtyń tóraǵalyǵymen partııanyń kezekten tys HІH sezi ótip, onda 2019 jyldyń 9 maýsymyna taǵaıyndalǵan kezekten tys prezıdenttik saılaýǵa Qasym-Jomart Toqaevtyń kandıdatýrasy bekitildi.
«Sez usynyp otyrǵan kandıdat Qasym Jomart Kemeluly Toqaev - elge óte tanymal tulǵa, bárimiz jaqsy bilemiz. Memleket jáne qoǵam qaıratkeri, ult zııalysy, qazaq mádenıeti men ádebıetine shynaıy janashyr jan. Siz sengen adamǵa el de senedi dep sendirgimiz keledi», - dedi Nurtóre Júsip.
Budan buryn habarlanǵandaı, Elbasy Nursultan Nazarbaev Prezıdent saılaýy halqymyzdy bıik maqsattarǵa jumyldyratynyn atap ótti.
«Elimizdegi bılik sabaqtastyǵyn jalǵastyrý - Ata Zańymyzǵa tolyq sáıkes keledi. Eki apta buryn Memleket basshysy Qasym-Jomart Kemeluly Toqaev kezekten tys saılaý ótkizý týraly Jarlyqqa qol qoıdy. Bul jan-jaqty oılastyrylyp jasalǵan qadam. Qasym-Jomart Kemeluly árbir iske zor jaýapkershilikpen qaraıtyn memleket qaıratkeri. Ol aıqyn saıasat júrgizýdiń qanshalyqty mańyzdy ekenin jaqsy biledi», - dedi N. Nazarbaev.