Nurtóre Júsip Qyzylorda oblysynyń qurmetti azamaty atandy

QYZYLORDA. QazAqparat - QR Táýelsizdik kúnine oraı búgin Qyzylordada ótken saltanatty sharada 48 qyzylordalyq memlekettik nagradaǵa ıe boldy. Sondaı-aq, Syr óńirinen shyqqan úsh azamat «Qyzylorda oblysynyń qurmetti azamaty» ataǵyna ıe boldy, dep habarlaıdy QazAqparat tilshisi.

Saltanatty sharada oblys ákimi Qyrymbek Kósherbaev táýelsizdik jyldary Syr óńiri ekonomıka men ónerkásiptiń barlyq salalarynda turaqty ósimge qol jetkizgenin atap ótti.

«Syr óńiri de Táýelsiz Qazaqstannyń damýyna óz úlesin qosyp keledi. Bıyl barsha álemge tanylǵan jetistigimiz - Qorqyt ata murasy ıÝNESKO-nyń materıaldyq emes mádenı muralar tizimine engizildi. Bul - Elbasynyń «Uly dalanyń jeti qyry» baǵdarlamalyq maqalasyna  syrboıylyqtardyń laıyqty jaýaby. 2018 jylǵy qorytyndysymen boıynsha Qyzylorda oblysy bıznesti júrgizý úshin qolaıly jaǵdaı jasaǵan eń úzdik óńir dep tanyldy, - dedi aımaq basshysy.

Indýstrııalandyrý kartasynyń birinshi jáne ekinshi besjyldyǵy aıasynda júzege asyrylǵan 22 jobanyń búgingi kúni 17-si ónim shyǵarýdy qamtamasyz etýde. Baǵdarlama aıasynda aǵymdaǵy jyly ák óndiretin zaýyt jumysyn bastady. Al 11 jeltoqsanda jalpyulttyq telekópir aıasynda tamponajdy tsement óndiretin zaýyt iske qosyldy.

Oblysta hımııalyq jáne taý-ken metallýrgııalyq klasterlerdi qurý aıasynda birqatar aýqymdy jobalar júzege asyrylýda. «Shalqııa» qorǵasyn-myrysh kenishi qurylysynyń alǵashqy kapsýlasy salyndy, sondaı-aq «Balasaýysqandyq» vanadıı ken ornyn ıgerý jáne kaltsıılendirilgen soda shyǵaratyn zaýyt salý jumystary jalǵasýda.

Sonymen qatar, agroónerkásiptik keshendi damytý boıynsha jumystar júrgizilýde; aýyl sharýashylyǵynyń negizgi kapıtalyna salynǵan ınvestıtsııa kólemi 23 ese jáne tek bıylǵy jyldyń ózinde 34,7%-ǵa ósti.

Saltanatty jıynda birqatar qyzylordalyqtar kásibı qyzmettegi jetistikteri úshin memlekettik nagradaǵa ıe boldy. Syr óńirinen shyqqan úsh azamat «Qyzylorda oblysynyń qurmetti azamaty» ataǵyna ıe boldy. Olardyń qatarynda Qazaq SSR Balyq sharýashylyǵy mınıstri qyzmetin atqarǵan memleket jáne qoǵam qaıratkeri Qudaıbergen Sarjanov, hımııa ǵylymdarynyń doktory, professor, Qazaqstan men KSRO eńbek sińirgen ónertapqyshy Ábdýalı Baeshov jáne respýblıkalyq qoǵamdyq-saıası «Aıqyn» gazetiniń bas redaktory, jazýshy, jýrnalıst Nurtóre Júsip bar.

Sondaı-aq, túrli saladaǵy 48 adam Qazaqstan Respýblıkasynyń ordenderimen jáne medaldarymen, Qurmet gramotalarymen nagradtaldy.