Nurtóre Júsip elimizde ilespe aýdarmashylardy daıarlaý jóninde usynys aıtty
Іlespe aýdarmashylar kelissózderdiń nátıjesine asa mańyzdy ról atqarady. Senator olardy daıyndaý sapasy máselesi búgingi tańda ózekti bolyp otyrǵanyn jetkizdi. Depýtattyń aıtýynsha, 2016-2018 jyldar aralyǵynda QR Ǵylym jáne joǵary bilim mınıstrliginiń Til saıasaty komıteti ilespe aýdarmashylardy daıarlaý kýrstaryn ótkizgen bolatyn. Biraq bul sharalar jumys josparynan shyǵarylǵan.
«Shet tilderden memlekettik tilge tikeleı aýdaratyn mamandar da az. Elimizde tikeleı ilespe aýdarmashylardy daıyndaıtyn oqý orny joq. Abylaıhan atyndaǵy Halyqaralyq qatynastar jáne álem tilderi ýnıversıtetinde ilespe aýdarma mamany aǵylshyn-orys, orys-aǵylshyn tili baǵytynda daıyndalady», - dedi Nurtóre Júsip.
Senator QR Parlamentinde de mundaı aýdarma jumysyn zańdardy redaktsııalaýmen aınalysatyn bólimniń mamandary qamtamasyz etetinin aıtty. Memlekettik tildi qoldaný aıasyn keńeıtýdegi ilespe aýdarmashylardyń mańyzyn eskere otyryp, senator sala mamandaryn daıarlaý jóninde birqatar sharalar usyndy.
«Іlespe aýdarmashylardyń biliktiligin arttyrý kýrstaryn uıymdastyrý, memlekettik organdardyń ortalyq apparattaryndaǵy zań tilin jetik meńgergen, ilespe aýdarmany júzege asyrýǵa beıimi bar mamandar úshin kýrstar uıymdastyrý, olardy QR Memlekettik qyzmet isteri agenttigi, Parlament Palatalarynyń kadr jumysy bólimderi arqyly rezervke qoıý mańyzdy. Memlekettik organdardyń ortalyq apparattarynda qyzmet isteıtin, ilespe aýdarma jasaýǵa jáne zań shyǵarý isiniń aýdarma jumysyna beıimi bar aýdarmashy mamandardyń Parlament palatalarynyń apparattarynda taǵylymdamadan ótý múmkindigin qarastyrýyńyzdy suraımyn. Bul ári tájirıbe almasýǵa ári mamandardyń biliktiligin arttyrýǵa, túptep kelgende, osyndaı mamandar rezervin qalyptastyrýǵa jaǵdaı jasaıdy», - dedi Nurtóre Júsip.