Nurtóre Júsip: Eldiń ishki qýatyna kóp nárse baılanysty
«Prezıdenttiń bıylǵy Joldaýy tarıhı mánge ıe. Qańtar dúrbeleńinen keıin bir jaǵy úreı, bir jaǵy úmit qushaǵynda qalǵan jurttyń eńsesi kóterildi. Sanaǵa silkinis ákeldi. Senim oty tutandy. Joldaýdyń túıindi tusynda Prezıdent Qasym-Jomart Toqaev: «Biz ár qadamymyzdy saralap, tańdaǵan jolymyzben alǵa senimdi qadam basamyz. Biz jańa Qazaqstanda «túrli kózqaras, biraq birtutas ult» qaǵıdatyn berik ustanýǵa tıispiz. Bir-birimizdi jat kórmeı, jaqyn tartyp, qoǵamda naqty ózgeristerge degen senimdi ornyqtyramyz. Jurtymyzdyń kúsh-jigerine, daryny men eńbekqorlyǵyna súıenemiz. Ár azamattyń óz qabiletin iske asyrýyna barynsha qolaıly jaǵdaı jasaımyz. Biz osylaısha ǵana halqymyzdyń jasampazdyq áleýetin arttyra alamyz. Osylaısha ǵana ómirdiń barlyq salasyn ózgertip, reformalar dáýirin óz qolymyzben jasaımyz. Biz kez kelgen syn-qaterdi birge eńserip, Qazaqstanymyzdyń qýatyn birge arttyramyz dep senemin» dedi. Halqymyz mundaıda «Jumyla kótergen júk jeńil» deıtin. Shyn máninde halyqtyń ishki qýatyna kóp nárse baılanysty. Qazir qaýip-qater jan-jaqtan tóngen kez. Álemdik saıasat myń qubylyp tur. Rýstiń eki balasy bir-birine qanjar kezep tur. Іrgedegi alyp memleketke salynǵan sanktsııalar salqyny Qazaqstanǵa da tımeı qalmaıtyn sııaqty...Teńge teńselip, azyq-túlik qymbattap barady. Alda kóktemgi jer jyrtý, egin egý tárizdi kezek kúttirmes sharýalar bar. Memlekettiń azyq-túlik qaýipsizdigin qamtamasyz etý Úkimettiń aldynda turǵan birinshi kezektegi mindet. «Toq bala ash balamen oınamas» degendeı, eldiń toqtyǵy, áleýmettik jaǵdaıy kún tártibinen túspeýi tıis», - dedi senator.
Onyń atap ótýinshe, Memleket basshysy óz Joldaýynda barlyq máseleni ashyq aıtty.
«Biz ádette jyl saıynǵy Joldaýdan soń jelpildegen jıyndarǵa ıek artamyz. Onyń arty jalǵan aqpar berýge, bolmaǵandy boldy, tolmaǵandy toldy deýge ulasady. Memleket basshysy óz Joldaýynda barlyq máseleni ashyq aıtty. Naqty aıtty. Bir is bolsa da bitkeni jaqsy. «Erteń jaqsy bolady, nemese 2030-da jaqsy ómir súremiz» degen buldyr da bulyńǵyr úmitpen ómir súrýge bolmaıdy. Osy rette Prezıdent «Men azamattarymyzdyń erteń emes, búgin baqytty ómir súrgenin qalaımyn. Eń bastysy – elimizdiń egemendigi! Shyn máninde, biz úshin Qazaqstannyń Táýelsizdigi bárinen qymbat. Osy turaqsyz, qubylmaly álemde Qazaqstanymyz bizden basqa eshkimge kerek emes. Sondyqtan maǵan elimniń amandyǵy men jerimniń tutastyǵynan asqan eshbir qundylyq joq» dedi. Osy Joldaý jarııalanǵanǵa deıin el-jurt «Endi ne bolar eken, erteńimiz qalaı bolady, qandaı saıası ózgerister jasalady?» dep kúpti kóńilde boldy», - dedi ol.
Nurtóre Júsip Prezıdent Joldaýynda eldi eleń etkizgen kóptegen jańalyqtar bolǵanyna nazar aýdartady.
«Abaı, Ulytaý oblystarynyń qurylýy, Almaty jáne Jetisý oblystarynyń irgesi ajyrap, jańa aýmaqtyq-ákimshilik qurylymǵa aınalýy halyqtyń kókeıinen shyqty. Qapshaǵaı qalasyna Dinmuhammed Qonaev esimin berý týraly usynys ta óte oryndy. Memleket basshysy: «Maqsatqa jetý úshin memlekettik apparatty jańartý nemese kadrlyq aýys-túıis jasaý jetkiliksiz. Ózgeristi árqaısymyz ózimizden bastaýymyz kerek. Árbir adam jáne búkil qoǵam jańǵyrýy qajet. Qundylyqtarymyz túbegeıli jańarýǵa tıis. Munyń bári – ońaı jumys emes, birtindep qalyptasyp, jyldar boıy jalǵasatyn úderis. Bul jumys bizden joǵary jaýapkershilikti, elimizge jáne bir-birimizge degen janashyrlyqty talap etedi. Bizge eshkim syrttan kelip, eshteńe jasap bermeıtini anyq, bári óz qolymyzda. Sondyqtan barshańyzdy jańa Qazaqstandy qurýǵa bir kisideı jumylýǵa shaqyramyn. Halyqtyń qoldaýymen maqsatymyzǵa jetemiz dep senemin» degende qoǵamdaǵy ózgeristerdi jasaýda jurttyń jumyla kirisýi qajettigin meńzep otyr. Ult ustazy Ahmet Baıtursynulynyń «Jurt jumysy – qumyrsqanyń ıleýindegi jumysqa uqsaıdy: qumyrsqasha jabyla tynbaı istese ónedi. Ultyn kerek qylyp, halyqqa qyzmet qylamyn degen qazaq balalary qazaq jumysyna qolynan kelgenshe qarap turmaı kirisip isteı berse – ult jumysy ulǵaıyp, tolyqpaqshy», - degen ataly sózi bar. Bizge de tynymsyz tirlik, turaqty birlik qajet», - dedi senator.
Sonymen qatar ol Prezıdent bastamalary men usynystary óte aýqymdy ekendigin de basa aıtty.
«Elimizdiń saıası júıesi men ákimshilik-aýmaqtyq qurylymynda birqatar eleýli ózgerister bolady. Memleket basshysy usynǵan sharalardy júzege asyrý úshin Konstıtýtsııanyń 30-dan astam babyna ózgeris engizý qajet. Sondaı-aq jyldyń sońyna deıin taǵy 20-dan astam zań qabyldaý kerek. Parlament depýtattary osy baǵytta aıanbaı jumys isteıdi degen oıdamyn», - dedi Nurtóre Júsip.