Nursultannan Aral teńizine «Aral 2019» ekspedıtsııasy jolǵa shyqty
Respýblıkalyq qoǵamdyq birlestik pen Nazarbaev Ýnıversıteti mamandary birlesip Soltústik Aralǵa ǵylymı-tanymdyq ekspedıtsııa uıymdastyrmaq.
17 kúnge josparlanǵan sapar Aral teńiziniń Qazaqstan aýmaǵy boıynsha 4000 shaqyrymyn qamtıdy. 2019 jyldyń 12 - 28 mamyry aralyǵynda saıahatshylar kelesi baǵyt boıynsha jol júredi: Nur-Sultan - Arqalyq - Torǵaı - Yrǵyz - Shalqar - Begimbet - Bozoı - Ońtústik núktesi - Chernyshev shyǵanaǵy - Qulandy - Tuşybas - Shevchenko shyǵanaǵy- Shubartaraýyz túbegi - Aqespe - Býtakov shyǵanaǵy - Qotyrnaq túbegi - Aral - Qamystybas - Qaratereń - Kókaral bógeti- Qaratereń - Baıqońyr - Qyzylorda - Jezqazǵan - Qaraǵandy - Nur-Sultan.
Bul qoǵamdyq birlestiktiń Aralǵa baǵyttalǵan úshinshi ekspedıtsııasy. 2016 jyldan bastap dástúrli túrde ótkiziletin sharaǵa sheteldik jáne qazaqstandyq ǵalymdar, geografııalyq qoǵamnyń belsendi músheleri men kásibı saıahatshylar qatysady.
Aldyńǵy ekspedıtsııalar kezinde Soltústik Araldyń birneshe bólikterinde sýdyń gıdrobıologııalyq kúıi zerttelgen bolatyn. Osyǵan deıin Aral teńiziniń ortasha tuzdylyǵynyń tómendeý betalysy tirkelgen edi. Bul Soltústik Araldaǵy ekologııalyq jaǵdaıdyń jaqsaryp kele jatqany týraly aldyn ala qorytyndy shyǵarýǵa múmkindik berdi.
Aıta keter jaıt, 2018 jyly Nazarbaev Ýnıversıtetiniń gıdrobıolog ǵalymdarymen birge zertteý spektrine Ońtústik Aral kirip, teńizdiń Ózbekstan bóligi de zertteýge alyndy. Ǵylymı synamalardyń nátıjeleri boıynsha planktondyq toptanýlardyń bıoalýantúrliligi, sýdyń lastyǵy, qyshqyldyǵy, tuz, fosfor deńgeıi týraly derekter jınaldy. Ol Soltústik jáne Ońtústik Aral ekojúıesiniń damýyndaǵy aldyn ala trendti anyqtaýǵa múmkindik berdi. Ǵylymı zertteý jumystarynan bólek, ekspedıtsııanyń maqsaty - Aral óńiri boıynsha týrıstik baǵyt kartasyn jasap, biregeı foto-jáne beınematerıaldar jınaýdy kózdeıdi.