Nursultan ómir boıy shyndyq úshin kúresip kele jatqan adam - M. Joldasbekov

ASTANA. QazAqparat - Nursultan Nazarbaev ómir boıy shyndyq úshin kúresip kele jatqan adam. "Tyǵyryqtan jol tapqan" fılminiń tusaýkeser kórsetiliminde memleket jáne qoǵam qaıratkeri, ǵalym, fılologııa ǵylymynyń doktory, professor, akademık Myrzataı Joldasbekov osylaı aıtty.

"Nurekeń óte jas jetildi. Qazaq azamattarynyń qolynan kelmegen úlken Ortalyq partııa komıtetiniń qabyrǵasynyń ózinde kúresti. Ol kezde jurt jalǵan raport berýge áýes edi. Shyndyqtyń barlyǵyn jasyratyn, jalǵan sóıleıtin. Al Nursultan ómir boıy shyndyq úshin kúresip kele jatqan adam. Sol kúresten aqyr sońynda baqytyn tapty", - dedi ol tilshilerge bergen suhbatynda.

Onyń aıtýynsha, Elbasy halyq tizginin bir mezette alǵan joq, oǵan bul deńgeıge jetý úshin úlken ter tógýge keldi.

"Nursultan Nazarbaev bir kúnde osylaı jetilip, jurt biletin Prezıdent bolǵan joq. Onyń joly óte aýyr boldy. Buralań boldy. Sol tyǵyryqtan jol tapqan, elin osyndaı kóshke bastaǵan, eń aýyr kezde el tizginin qolyna alǵan, taǵdyryna jaýap bergen, sony moınyna alǵan, halyqtan shyqqan kemeńger. Sondyqtan elimiz myna jarqyn mereke kúni Qazaqstan Tuńǵysh Prezıdentiniń kúni Nurekeńniń ózi qatysyp, bala-shaǵasymen kelip, ortamyzda otyrdy", - deıdi jazýshy.

"Meniń tańǵalatynym bul ári derekti ári kórkem fılm. Basqasha bolýy múmkin emes te edi. Kremldi aýzyna qaratý ońaı emes, sony aýzyna qaratqan adam. Men kópshilikke, barsha Qazaqstan azamattaryna osy fılmniń shyǵýymen qutty bolsyn deımin", - dep túıdi sózin M. Joldasbekov.

"Tyǵyryqtan jol tapqan" fılminiń tusaýkeser kórsetilimine QR Prezıdenti Nursultan Nazarbaevtyń ózi qatysqandyǵyn aıta ketý kerek. Kınojobany QR Mádenıet jáne sport mınıstrliginiń tapsyrysymen Sháken Aımanov atyndaǵy Qazaqfılm kınostýdııasy túsirgen.

Onda Qazaqstan Prezıdenti Nursultan Nazarbaevtyń 1970-shi jyldardaǵy eńbek joly, saıasatqa endi ǵana qadam basqan sátteri sýrettelgen. Fılmniń rejısseri - Rústem Ábdirashov.

Eske sala keteıik, 2011 jyldan beri "Elbasy joly" kınoepopeıasy túsirilip kele jatyr. Bunyń aldynda kınoepopeıaǵa "Balalyq shaǵymnyń aspany" (2011), "Otty ózen" jáne "Temir taý" (2013) fılmderi engen bolatyn.

"Tyǵyryqtan jol tapqan" fılminiń túsirilimi 2014 jyly aqpan aıynda bastaldy. Kınoǵa qazaqstandyq akterlermen birge Valentın Gaft, Evgenıı Sıdıhın, Vladımır Steklov, Evgenıı Stychkın, Vıktor Sýhorýkov syndy reseılik akterler endi. Elbasynyń beınesin qazaqstandyq akter Nurlan Álimjanov somdady. Fılm kópshilik nazaryna 4 jeltoqsanda Qazaqstannyń 25 qalasynda 50 kınoteatrda tartý etiledi dep josparlanǵan.