Nursultan Nazarbaevtyń «Táýelsizdik dáýir» kitabyn oqý baǵdarlamasyna engizý usynyldy
Mundaı usynysty Qyzylorda memlekettik ýnıversıteti QHA kafedrasynyń meńgerýshisi, tarıh ǵylymdarynyń kandıdaty Nurlybek Myńjas jasady, dep habarlaıdy QazAqparat.
Aıta keterligi, búgin L.Gýmılev atyndaǵy Eýrazııa ulttyq ýnıversıtetinde Memleket basshysy Nursultan Nazarbaevtyń «Táýelsizdik dáýiri» kitabyn talqylaýǵa arnalǵan Qazaqstan halqy Assambleıasy kafedralary respýblıkalyq qaýymdastyǵynyń keńeıtilgen otyrysy ótken bolatyn. Sharada Qyzylordadan tikeleı beıne baılanysqa shyqqan Nurlybek Myńjas Elbasy kitabyna shırek ǵasyrdaǵy memlekettiń adam kapıtalyna degen kózqarasyn jańa synı turǵyda tujyrymdaǵan, tarıhı baǵa bergen tuşymdy eńbek dep atap ótti.
«Bul barsha qazaqstandyqtar úshin búgingi ómirdiń negizgi rýhanı tirekteriniń, ekonomıkalyq-áleýmettik damýdyń, mádenı jańǵyrýdyń basty paradıgmalyq qundylyǵyn kórsetetin jańalyq bolyp enip jatyr. Sonymen qatar Elbasynyń eńbegi bolashaqta tórtinshi revolıýtsııalyq jańǵyrǵan dúnıejúzilik qaýymdastyq jaǵdaıynda aldyńǵy qatarly damyǵan elderdiń legine bizdiń respýblıkamyzdyń laıyqty túrde enýiniń jańa formýlasy dep túsinip otyrmyz», - dedi ol.
Osy rette QHA meńgerýshisi eki usynys jasady.
«Aldaǵy ýaqytta oqylatyn «Rýhanı jańǵyrý» pánine eń birinshiden Abaı Qunanbaevtyń 45 qara sózin qossaq. Sebebi álem moıyndaǵan hakim Abaıdyń naqyl sózderi, kózqarastary keıingi ýaqyttaǵy Alash qaıratkerleriniń, Táýelsizdik tusyndaǵy bizderdiń azattyq jolyndaǵy kúresimizdiń tıisti jalǵasy dep oılaımyn. Elbasynyń «Rýhanı jańǵyrý» maqalasynyń astary da Abaıdyń ulttyq pragmatıkalyq kózqarastarymen mazmundas. Olar bir-birin tolyqtyryp, jetildirip tur. Ekinshiden Elbasymyzdyń «Táýelsizdik dáýiri» atty kitabyn da «Rýhanı jańǵyrý» pánine qosýdy usynamyn», - dedi Nurlybek Myńjas.