Nursultan Nazarbaevtyń kitaby portýgal tilinde jaryqqa shyǵady

ASTANA. QazAqparat - Qazaqstan Prezıdenti Nursultan Nazarbaevtyń kitaby Brazılııada portýgal tilinde jaryqqa shyǵady. Bul týraly búgin Astanada brazılııalyq áriptesi Aloızıo Nýnessa Ferreıromen kezdeskennen keıingi brıfınge QR Syrtqy ister mınıstri Qaırat Ábdirahmanov málim etti, dep habarlaıdy QazAqparat.

«Aldaǵy jyly portýgal tilinde Brazılııada Memleket basshysy Nursultan Nazarbaevtyń «Táýelsizdik dáýiri» atty tanymal kitaby jaryqqa shyǵady. Osy arqyly Qazaqstan Prezıdenti bastamashylyq etken «Rýhanı jańǵyrý» baǵdarlamasy ońtústikamerıkalyq kontınentte de tájirıbe júzinde iske asyrylady», - dedi Qaırat Ábdirahmanov. 

Mınıstrdiń atap ótýinshe, Brazılııa Ońtústik Amerıkadaǵy Qazaqstannyń iri seriktesteriniń biri. Eki el ózara qashyq jerde ornalassa da, bizdi dostyqtyń, yntymaqtastyqtyń, syılastyqtyń qatynastary biriktirip keledi.

«Búgin brazılııalyq áriptesimmen ekijaqty qatynastarǵa baılanysty barlyq salalardy, sondaı-aq halyqaralyq kún tártibindegi máselelerdi tyńǵylyqty talqylyp shyqtyq», - dedi Q. Ábidirahmanov.  

Osy oraıda mınıstr búginde negizgi halyqaralyq problemalar turǵysynda Qazaqstan men Brazılııanyń ustanymdary sáıkes keletinin atap ótti.

«Kezdesý barysynda qos tarap ınvestıtsııalyq jáne saýda-ekonomıkalyq yntymaqtastyqqa aıryqsha ekpin qoıdy. Osy baǵyttarda ózara is-qımyldy nyǵaıtýǵa qatysty mindetterdi belgiledik. Eki el arasyndaǵy saýda kólemi 135 mln AQSh dollarynan asty. Jalpy, saýda salasynyń deńgeıin kóterý úshin bizdiń áleýetimiz áli de joǵary ekenin aıtqym keledi», - dedi QR SІM basshysy.

Munymen qosa, QR SІM basshysy BUU Qaýipsizdik Keńesine turaqty emes múshelikke baılanysty aldaǵy daýys berý protsesinde Brazılııaǵa sáttilik tiledi.

«Osyǵan baılanysty BUU Qaýipsizdik Keńesi quramyndaǵy jumys tájirıbemizben bólisýge ázirmiz. Bul turǵyda Brazılııanyń músheligi kezeńinde QR Prezıdentiniń bastamalaryn júzege asyrý óziniń jalǵasatyn tabatyndyǵyna senimdimiz», - dedi ol.