Nursultan Nazarbaevtyń alǵashqy ınaýgýratsııasy qalaı ótti

ALMATY. QazAqparat - 16-17 jeltoqsanda Qazaqstanda basty mereke - Táýelsizdik kúni atalyp ótedi. «Memlekettiń táýelsizdigi men egemendigi týraly» zań 1991 jyly 16 jeltoqsanda Qazaq SSR Joǵarǵy Keńesinde qabyldandy. Bul is-shara sol kúni buqaralyq aqparat quraldarynda qalaı kórsetilgen jáne Tuńǵysh Prezıdent Nursultan Nazarbaevtyń alǵashqy ınaýgýratsııasy qalaı ótkenin «QazAqparat» HAA burynǵy jáne qazirgi tilshileri eske túsirdi.

90-jyldardyń basynda agenttik QazTAG dep ataldy.

Almatydaǵy korrespondenttik bıýronyń burynǵy jetekshisi Sara Mustafına bizdiń tilshimizge Qazaqstannyń táýelsizdigin jarııalaǵan kún týraly aıtyp berdi.

«1991 jyldyń 16 jeltoqsany - bizdiń memleket úshin óte mańyzdy tarıhı kún. Qazaqstan táýelsizdik aldy, álem kartasynda jańa memleket paıda boldy. Biz bul habarlamany bas redaktor Tamara Georgıevna Tolıkınamen oqyp, ony barlyq buqaralyq aqparat quraldaryna jiberdik.Úsh saǵattan keıin birinshi bolyp Qazaqstandy Túrkııa memleketi moıyndady. Bul jańalyq «QazTAG habarlaǵandaı»,– degen taqyryppen búkil álemge tez tarady. Sodan keıin kóptegen elderdiń osyǵan uqsas basqa resmı málimdemeleri shyqty. Sol kezdegi jas memlekettiń - jańa basqarý saıasatyn qalyptastyrý, óziniń qurylymdary men bólimderin qurý, olardyń birinshi basshylaryn taǵaıyndaý jáne taǵy basqalar bizdiń agenttiktiń jańalyqtar lentasynda kórinis tapty», - dep eske alady Sara Mustafına.

Nursultan Nazarbaevtyń Prezıdent retinde alǵashqy ant berý rásimi 1991 jyly 10 jeltoqsanda Almatydaǵy Respýblıka saraıynda Joǵary Keńes depýtattarynyń qatysýymen ótti. QazTAG (qazirgi «QazAqparat» - avtor) fototilshileri sol kúnniń kýási boldy.

«Ulyqtaý Almatydaǵy Lenın saraıynda (qazirgi Respýblıka saraıy) ótti. Onda kóptegen jýrnalıster men fotograftar boldy.Olardyń ishinde bizde barmyz. Barlyq BAQ shaqyryldy, sondyqtan is-sharaǵa qatysý qıyn bolǵan joq.Barlyǵy jaqsy ótti. Saltanatty rásim 1,5-2 saǵatqa sozyldy. Prezıdent kúlimsirep, ózin laıyqty ustady. Ol aqsaqaldar shapan jaýyp, ádemi belbeýdi usynǵanda baıypty boldy. Mende tipti fotosýret bar», - deıdi agenttiktiń burynǵy fotografy Anatolıı Ýstınenko.

Almatydaǵy alǵashqy ınaýgýratsııada aqyn Sháker Ábenov Elbasy Nursultan Nazarbaevqa bata berip, ıyǵyna shapan japty. Bul sátti fototilshi Aleksandr Pavskıı túsirip aldy.

«Bul kúni QazTAG-tan úsh fototilshi boldy - Iosıf Lvovıch Býdnevıch, Anatolıı Ýstınenko jáne men. Men bul tarıhı sátti túrli-tústi sýretke túsirdim. Sodan keıin bárimiz keńsege baryp, fotolardy shyǵardyq. Basylymdarǵa eń sátti jáne ádemi shyqqandaryn tańdap aldyq.Árıne, basshylyqpen kelise otyryp. Sodan keıin, kýrer arqyly sol kezdegi barlyq gazetterge jetkizildi. Olar birinshi betterinde jarııalady»,– dep eske aldy Aleksandr Pavskıı.