Nursultan Nazarbaev: Jańa zaman keldi – bárimiz ózgerýimiz kerek

NUR-SULTAN. QazAqparat – Elbasy Nursultan Nazarbaev «Qazaqstan» ulttyq arnasyndaǵy «Túrkistan: Kóne men keleshek kópiri» derekti fılminde «Rýhanı jańǵyrý» men «Uly dalanyń jeti qyry» baǵdarlamalarynyń mańyzdylyǵyn erekshe atap ótti, dep habarlaıdy QazAqparat tilshisi.

««Rýhanı jańǵyrý» degen... Biz basqa ómirge keldik. Burynǵy ómirde kommýnıstik ıdeıamen júrdik. Bizdiń úlkenderimiz, meniń býynym sol ıdeıamen júrdi. Endi ózgerýimiz kerek. Jańa zaman keldi. Ekonomıka ózgerdi. Túsinik ózgerdi. Jastar qazir basqasha. Bizdeı emes. On bestegi balalardyń bilimi bizden kóp. Sebebi olar ınternette otyryp, dúnıeniń barlyǵyn kóredi, biledi. Sondyqtan «Rýhanı jańǵyrý» degen tek osy zamanǵa beıimdelý ǵana emes, osy arqyly ósip, órkendeý máselesi. Sondyqtan ol óte kerekti, úlken maǵynasy bar, áli talaı jumys júrgizetin másele», - dedi Elbasy «Qazaqstan» ulttyq arnasyndaǵy «Túrkistan: Kóne men keleshek kópiri» derekti fılminde.

Nursultan Nazarbaevtyń aıtýynsha, osy baǵdarlamamen Túrkistannyń salynýy úndesedi.

«Uly dalanyń jeti qyryna baılanysty qandaı tarıhty basyp ótkenimizdi aıtyp otyrmyn ǵoı. Sol tarıhty eldiń bári bile bermeıdi. Sol tarıhty sińirý úshin elimizdiń ońtústiginde, osy jerden myń shaqyrym jerde «osynda tońǵan qazaqtar sol jerge baryp jylynyp qaıtyp kelsin» dep salynyp jatyr. Túrkistannyń salynýyn – sol baǵdarlamanyń oryndalýynyń bir salasy dep esepteý kerek», - dedi Elbasy.