Nursultan Nazarbaev: ıAdrolyq derjava bolǵanymyzda búgingideı jetistikke jetpeıtin edik
«AQSh, Reseı jáne Qytaıdan keıingi álemdegi tórtinshi ıadrolyq arsenaldan sanaly túrde bas tarttyq. Bizde 1100 oqtumsyq, Amerıka Qurama Shtattarynyń terrıtorııasyna deıin jete alatyn 110 dana SS-18 zymyrandary boldy. Sol kezde olardy qaldyryp, ıadrolyq derjavaǵa aınalý, barlyǵyn qorqytý tóńireginde kóptegen pikirtalas boldy. Degenmen halyq meniń sheshimime qoldaý kórsetti jáne biz durys jasadyq», - dedi Nursultan Nazarbaev.
Elbasy sonyń arqasynda Qazaqstan 25 jyldyń ishinde álemniń barlyq elderiniń senimine ıe bolyp, halyqaralyq arenada bedeli óskenin, 300 mlrd dollardan astam tikeleı shetel ınvestıtsııasyn tarta alǵanyn, sol ınvestıtsııalar el ekonomıkasyn kótergendigin aıtty.
«Al eger biz ıadrolyq derjava bolǵanymyzda qazir Soltústik Koreıa sııaqty bolar edik. Sondyqtan da bizdiń ıadrolyq qarýdan bas tartqan el retinde moraldyq quqymyz bar. Men osy moraldyq quqyǵymyzdy paıdalana otyryp, Iranmen, ózim jaqsy biletin Prezıdenti Homeınımen sóılesip, bizdiń bas tartqanymyzdy aıttym. «Sizder 10 atom bombasyna ıe bolarsyzdar, al álemde olardyń sany 7,5 myń. Al bul Táýelsizdikke qorǵan bola ma?», dedim. Táýelsizdikti barlyq memlekettermen jaqsy qarym-qatynas, eldiń bedeli, ıgi esimi beredi. Dál sol sııaqty Soltústik Koreıaǵa da sóz arnap, ıadrolyq qarýdyń Táýlesizdiktiń tiregi emes kerisinshe qozdyrǵyshy bolatyndyǵyn aıtamyn. Qazir olar toqtap, búkil álemge bas tartatyndyǵyn aıtar bolsa, biz sııaqty tatý-tátti qarym-qatynasty olar da ala alar edi. Odan keıin ınvestıtsııa kelip, ol eldi damytyp, halyqtyń turmys-tirshiligi jaqsara túsedi», - dedi Nursultan Nazarbaev.