Nursultan Nazarbaev Túrkııaǵa astyq eksporttaýdyń qysqa jolyn atady

ANKARA. QazAqparat - Búgin Túrkııanyń bıznes kapıtandarymen kezdesý barysynda Elbasy Nursultan Nazarbaev olardy elimizdiń agroónerkásip kesheni salasyndaǵy jobalardy júzege asyrýǵa shaqyrdy, dep habarlaıdy QazAqparat tilshisi.

«Qazaqstannyń agrarlyq sektory eń úlken sala bolyp sanalady. Agroónerkásip keshenin damytýdyń baǵdarlamasy júzege asyrylyp jatyr. Onda aýyl sharýashylyǵy ónimderin óndirýshiler men óńdeýshilerge memlekettik qoldaý kórsetý qarastyrylǵan. Negizgi maqsat jańa tehnologııalardy qoldana otyryp, ónimdi arttyrý jáne aýyl sharýashylyǵy ónimderin óńdeý men eksportqa shyǵarý bolyp tabylady», - dedi Memleket basshysy.

Osy oraıda Qazaqstan Prezıdenti túrik kompanııalaryn osy saladaǵy jobalardy belsendi júzege asyrýǵa shaqyrdy.

«Ózerińiz bilesizder, Qazaqstan búginde astyq eksporttaıtyn iri memleketterdiń biri sanalady. Bıylǵy jyly da astyq túsimi óte jaqsy, múmkinshilik bar. Sondyqtan Túrkııa jaǵyna astyqty, undy eksporttaý barysynda jańa múmkinshilikti paıdalanyp, Kaspıı Kavkaz arqyly jetkizýge bolady. Eki jaqtyń mınıstrleri bul múmkinshilikti qarastyrady dep senemin», - dedi Elbasy.

Aıta keteıik, Qazaqstan Prezıdentimen kezdesýge Túrkııa ekonomıkasynyń 15 paıyzyn quraıtyn 25 kompanııanyń basshylary qatysty. Atalǵan kompanııalar aýyl sharýashylyǵy, tamaq ónerkásibi, geologııa jáne taý-ken óndirý ónerkásibi, hımııa ónerkásibi, mashına jasaý, jeńil ónerkásip, densaýlyq saqtaý jáne farmatsevtıka salalarynda jumys isteıdi.