Nursultan Nazarbaev Túrkistandaǵy «Farab» kitaphanasyn aralap kórdi
Nursultan Nazarbaev «Farab» kitaphanasynyń tsıfrlyq óndiris zerthanasy jumysynyń nátıjelerimen tanysty, sondaı-aq sırek kitaptar men manýskrıpt (kóne zamanǵy qoljazba) zalyn aralap kórdi.
Oblystyq ǵylymı-ámbebap «Farab» kitaphanasynda 480 myńnan astam kitap qory bar.
Munda sırek kezdesetin oqýlyqtar az emes. Máselen kesenege júrgizilgen eń alǵashqy zertteý jumystary jaıly jazbalar da osynda saqtaýly. Aýdany 2 600 sharshy metrlik úsh qabatty ǵımarattyń sáýleti kitap betterine uqsas etip salynǵan.
«Kitaphana basqarýshy kompanııaǵa berilgen. Onda alańsyz kitap oqyp, adam rýhanı jaǵynan óz ózin damytýǵa múmkindik mol. Oqyrmandar úshin kitap oqý tegin. Balalar bul jerde ózderin jan-jaqty damyta alady. «Farab kitaphanasy» týrıstik ortalyqta ornalasqan. Ata-analar osy aralyqta balalaryn kitaphanadaǵy qyzmetkerlerge alańsyz qaldyra alady. Olarǵa aqyly túrde óte joǵary deńgeıde qyzmet túrleri kórsetiledi», - dedi kitaphananyń dırektory Aıko Tóken.
Jańa kitaphanada konferentsııa zaly, 100 oryndyq oqý zaly, ekspozıtsııa, kórme zaly, kitaphana murajaıy, kishi konferents-zal, balalar zaly, ulttyq ádebıet ortalyǵy, assambleıa, kovorkıng (bilim berý), ádet-ǵuryp jáne salt-dástúr ortalyǵy, Óner zaly, shetel tilindegi ádebıet jáne abonementter bólimi, merzimdi basylymdar zaly, Internet-zal, IT tehnologııalar kabıneti jáne qor saqtaý qoımasy bar. Budan bólek kınokontsert zaly, balalar balet stýdııasy, mýzykalyq úıirmeler, dybys jazý stýdııasy, teatr stýdııasy da qarastyrylǵan.