Nursultan Nazarbaev: Túrkistan úlken qala bolsa degen arman bar

ASTANA. QazAqparat - Prezıdent Nursultan Nazarbaev otandyq BAQ ókilderimen kezdesýde Shymkentten keıin kelesi kezekte qaı qalalardyń «mıllıondyq» áleýetiniń baryn aıtyp, Túrkistannyń túleýi týraly oıymen bólisti, dep habarlaıdy QazAqparat tilshisi.

«Bizge mıllıon adam turatyn qalalar kerek. Mıllıon turǵyny bar qalada - ǵylym da, mádenıet te, bilim de damıdy. Búkil álemde solaı. Keleshekte álemde iri 600 qala - megapolıs bolady da, negizgi báseke solardyń arasynda órbıdi dep aıtylyp jatyr. Adamdar sondaı qalalarda ómir súrgisi keletin bolady. Sondaı qalalardy kóbeıtý kerek. Táýelsizdik alǵaly beri sondaı mıllıon turǵyny bar úsh qalamyz bar. Endigi bolsyn degen oıym - Aqtóbe, múmkin Qaraǵandy. Ýrbanızatsııa báribir júrip jatyr», - dedi Nursultan Nazarbaev.

Prezıdenttiń aıtýynsha, AQSh-ta halyqtyń tek 2 paıyzy ǵana aýylda turady.

«Ondaǵy aýyl halqy ózin asyramaq túgili, aýyl sharýashylyǵy ónimderin eksporttap jatyr. Al bizde aýylda halyqtyń 43 paıyzy turady. Sondyqtan, bul másele el úshin de saıasat pen tarıh úshin de óte úlken másele dep sanaımyn. Túrkistandy kótersek, az jyldyń ishinde 300 myń halqy bar shahar bolyp shyǵady. Men onyń qurylysyn bekittim. Eń birinshiden, ákimdiktiń ortalyǵy, barlyq departamentter, úıdiń qurylysy, mádenı nysandar turǵyzylǵannan keıin birneshe mýzeıin, mysaly Qazaq handyǵynyń tarıhy, Túrki dúnıesiniń tarıhy degendeı salý kózdelýde», - dedi Elbasy.

Prezıdenttiń aıtýynsha, Túrkistanda Qazaqstannyń tarıhı jádigerleri jınaqtalyp, áýejaı men temir jol vokzaly jóndelse, qala budan da beter damı túsetinin aıtty.

«Qazir sol arqyly «Batys Qytaı-Batys Eýropa» degen dál ortasynan dáliz júrip jatyr. Jol bar. Sonda órkendep-ósip, týrısterdi tartyp, aqyry Túrkistan úlken qala bolyp shyqsa degen arman bar. Jyly jaqty jaqsy kórgender sol jaqqa baryp tursyn. Sergek bolamyn degender osynda (Astanaǵa) kelsin (kúldi)», - dep sózin aıaqtady Nursultan Nazarbaev.