Nursultan Nazarbaev Sochıde fýtboldan álem chempıonaty týraly aıtty

SOChI. QazAqparat - Qazaqstan Prezıdenti Nursultan Nazarbaev Reseı Prezıdenti Vladımır Pýtınge 2018 jyly fýtboldan álem chempıonatyn tabysty ótkizýge tilektes ekendigin bildirdi, dep habarlaıdy QazAqparat tilshisi.

«Kelesi aıdan Reseıde ǵalamshardyń eń basty sporttyq saıystarynyń biri fýtboldan álem birinshiligi bastalatyn bolady. Ǵalamsharlyq aýqymdaǵy úlken shara. Biz reseılik tarapqa ony tamasha ótkizýge, al reseılik fýtbolshylarǵa jeńis tileımiz», - dedi Qazaqstan Prezıdenti Joǵary Eýrazııalyq ekonomıkalyq keńestiń kezekti otyrysynda.

«Reseılik tarap qaıtalanbas merekelik atmosfera qalyptastyryp, osynaý mańyzdy sharany eń joǵary deńgeıde ótkizerine senimdimin. Biz bul sharaǵa shaqyrylamyz dep úmittenemiz», - dedi Nursultan Nazarbaev Reseı Prezıdenti Vladımır Pýtınge qarata.

Elbasynyń bul sózine jaýap bergen Reseı Prezıdenti «Barlyqtaryńyz da shaqyryldyńyzdar», - dep jaýap berdi.

Fýtboldan 2018 jylǵy álem chempıonaty 14 maýsymnan bastap 15 shildege deıin Reseıdiń 11 qalasyndaǵy 12 stadıonda ótetin bolady.

Aıta keteıik, Reseıdiń Sochı qalasynda memleket basshylarynyń qatysýymen Joǵary Eýrazııalyq ekonomıkalyq keńestiń (JEEK) kezekti otyrysy ótýde. Sharaǵa Qazaqstan Prezıdenti Nursultan Nazarbaev, Reseı basshysy Vladımır Pýtın, Qyrǵyzstan prezıdenti Sooronbaı Jeenbekov, Belarýs basshysy Aleksandr Lýkashenko jáne Armenııa Premer-Mınıstri Nıkol Pashınıan qatysýda.  Basqosýda Eýrazııalyq ekonomıkalyq odaq (EAEO) aıasyndaǵy kópbaǵytty yntymaqtastyqtyń túrli aspektileri, uıymnyń uıymdastyrý-kadrlyq baǵyttaǵy sharalary men aǵymdaǵy jumys barysy sóz bolady dep kútiledi. Kún tártibine 15 másele qoıylǵan. Olardyń ekeýi shaǵyn quramda qaralady.