Nursultan Nazarbaev RF Úkimetiniń tóraǵasy Mıhaıl Mıshýstınmen kezdesti

NUR-SULTAN. QazAqparat - Kezdesý barysynda Qazaqstannyń Tuńǵysh PrezıdentiMıhaıl Mıshýstındi jaýapty jáne mańyzdy laýazymǵa taǵaıyndalýymen quttyqtady, dep habarlaıdy QazAqparat Elbasynyń resmı saıtyna silteme jasap.

– Siz bul qyzmetke óte qıyn kezeńde kelip otyrsyz. Qazir jaǵdaı ońaı emes. Jańa laýazymda sizdiń mol tájirıbeńiz paıdaly bolady dep senemin. Keshe Almatyda tsıfrlandyrý jáne jasandy ıntellektini damytý máselelerin talqyladyńyzdar, - dedi Elbasy.

Nursultan Nazarbaev Qazaqstan táýelsizdik alǵannan beri Reseı Federatsııasymen tatý kórshilik qarym-qatynas ornatqanyn atap ótti.

– Men jumys istegen jyldardyń bárinde Qazaqstan men Reseı arasyndaǵy yntymaqtastyqty nyǵaıtýǵa tyrystym. Búgingi tańda bizdiń baılanystarymyz úlgi etýge turarlyq dep esepteımin. Aldaǵy ýaqytta da osylaı bolǵanyn qalaımyn, - dedi Qazaqstannyń Tuńǵysh Prezıdenti.

Óz kezeginde Mıhaıl Mıshýstın Elbasyǵa kezdesý úshin alǵys bildirip, Reseı Federatsııasynyń Prezıdenti Vladımır Pýtınniń jyly lebizderin jetkizdi.

– Men alǵashqy sheteldik saparymdy Qazaqstannan bastadym. Bizdiń qarym-qatynasymyz óte jaqsy. Osy múmkindikti paıdalanyp, men Reseı Federatsııasy Prezıdentiniń eń izgi tilekterin jetkizgim keledi, - dedi Reseı Federatsııasynyń Premer-Mınıstri.

Kezdesý barysynda taraptar Eýrazııa ekonomıkalyq odaǵy aıasyndaǵy yntymaqtastyqty damytýdyń qazirgi jaǵdaıy men perspektıvalaryn talqylady. Sondaı-aq, ınfraqurylymdy damytý jobalaryn iske asyrý jáne qurlyq elderi arasyndaǵy saýda qatynastaryn odan ári nyǵaıtý máselelerine toqtaldy.