Nursultan Nazarbaev pen Sı Tszınpın «Kompozıtor» fılminiń treılerin tamashalady
Qytaı kompozıtory Sıan Sınhaıdyń ómirine arnalǵan bul týyndy qazaqstandyq-qytaılyq birinshi kınojoba sanalady. Ol Ekinshi dúnıejúzilik soǵys jyldarynda Qazaqstanda turyp, qazaqtyń uly kompozıtory Baqytjan Baıqadamovpen jaqyn dos bolǵan.
Sıan Sınhaı 500-den astam lırıkalyq jáne buqaralyq ánniń avtory. Ánderiniń basym bóligi qytaı halqynyń arasynda keńinen tanymal. Sonymen qatar ol birqatar tanymal ánin qazaq jerinde jazǵan. Máselen, ol «Ult azattyǵy» sımfonııasyn Almatyda aıaqtaǵany belgili.
«Kompozıtor» fılmin Sháken Aımanov atyndaǵy «Qazaqfılm» kınostýdııasy men qytaılyq Shinework jáne Pictures China Film Coproduction Corporation kompanııalary birlesip túsirgen. Fılmde Baqytjan Baıqadamovtyń rólin Berik Aıtjanov, al Sıan Sınhaıdyń rólin qytaılyq akter Hý Tszıýn somdaıdy.
Aıta keteıik, Elbasy Nursultan Nazarbaev Qytaıǵa memlekettik saparmen kelip, búgin QHR Tóraǵasy Sı Tszınpınmen keńeıtilgen quramda kelissózder ótkizdi. Nátıjesinde birneshe qujatqa qol qoıyldy.
Sonymen qatar Memleket basshysy QHR Memlekettik keńesiniń premeri Lı Ketsıanmen júzdesti.
Al 10 maýsym kúni QR Prezıdenti Tsındao qalasynda ótetin Shanhaı yntymaqtastyq uıymyna múshe memleketter basshylarynyń keńesine qatysady dep kútilýde.