Nursultan Nazarbaev pánderdi aǵylshyn tilinde oqytýǵa qatysty pikir bildirdi
«Búginde biz qazaq pen orys tilderin jaqsy bilemiz. Negizgi másele - aǵylshynda. Ony oqý basty ıdeıa dep aıta almaımyn. Bul - qajettilik. Ol álem elderiniń ózara kommýnıkatsııa tiline aınaldy. Qazir balalarymyz jan-jaqta oqyp júr. Sondyqtan búginde aǵylshyn jaı til emes, kádimgideı qajettilik tiline aınaldy. Al tildi úırený úshin aldymen muǵalimdi úıretý kerek», - dedi N.Nazarbaev.
Osy oraıda, Prezıdent joǵary synyptarda qoldanbaly pánderdi aǵylshyn tilinde oqytý máselesin de túsindirdi.
«Ol kezde oqýshylar joǵary oqý ornyna túsýge daıyndalady. Al dál sol ýaqytta matematıka, fızıka, xımııa men bıologııanyń termınderin aǵylshyn tilinde túsinip úırenbese, shetelde baryp, oqı almaıdy. Sondyqtan muǵalimderge barynsha tyrysý kerek. Endi, aǵylshyn tilinde bir jyldyń ishinde úırete almaısyń. Al bizdikiler úsh aılyq kýrsty shyǵardy. Odan keıin matematıkany aǵylshyn tilinde úıretesiń deıdi. Ol - óte aýyr. Men ózim solaı istep kórdim. Qıyn nárse eken», - dep atap aıtty N.Nazarbaev.
Aıta keteıik, búgingi kezdesýde QR Prezıdenti Nursultan Nazarbaev barsha analar men qyz-kelinshekterdi 8 Naýryz - Halyqaralyq áıelder kúnimen quttyqtady. "Ananyń qudireti sheksiz. «Onyń aldynda búkil dúnıe bas ıedi» dep tegin aıtylmasa kerek. Erte zamanda jaýlasqan jurttyń ortasyna ana aq jaýlyǵyn tastaǵan kezde soǵys toqtalyp, bitimge keletin bolǵanyn bilemiz. Dástúrimizdi barynsha saqtap kele jatqan biz áıel zatyn ásirese qadirleıtin xalyqpyz. Qazaq ulty qyz balany árýaqytta alaqanyna salyp, aıalap otyratyn. Bul saltymyz otbasy úshin buzylmas zańdylyqqa aınalyp keledi. "Ana" degen qasterli sózdi estigende tebirenbeıtin júrek joq, tolqymaıtyn kóńil bolmaıdy", - deıdi N.Nazarbaev. Memleket basshysy kópbalaly otbasylarǵa kómek berý máselesin qozǵady. Eki kópbalaly anaǵa "Altyn alqa" men "Kúmis alqany" saltanatty túrde tapsyryldy. Prezıdent otbasynyń yntymaǵyn saqtaýdyń qupııasymen bólisti. Sondaı-aq, densaýlyq saqtaýdyń basty qaǵıdatyn ashyp berdi.
Eske salsaq, buǵan deıin biz muǵalimderge aǵylshyn tilin úıretý kýrstary toqtatylǵandyǵy týraly habarlaǵan bolatynbyz.