Nursultan Nazarbaev ortalyǵy Vatıkandaǵy Papa Keńesimen memorandýmǵa qol qoıdy

NUR-SULTAN. QazAqparat - Qazaqstan men Vatıkan arasyndaǵy baılanystar men senimniń tereńdeýine, sondaı-aq odan ári syndarly yntymaqtastyqty damytýǵa yqpal etý maqsatynda 15 qazanda Konfessııaaralyq jáne órkenıetaralyq dıalogty damytý jónindegi Nursultan Nazarbaev ortalyǵy basqarmasynyń tóraǵasy – Altaı Ábıbýllaev pen Qasıetti Taqtyń Dinaralyq dıalog jónindegi Papalyq Keńesiniń prezıdenti (Vatıkan) – kardınal Miguel Ángel Ayuso Guixot (onlaın rejıminde) alǵash ret ózara túsinistik týraly memorandýmǵa qol qoıdy, dep habarlaıdy QazAqparat.

«Rım Papasy Ioann Pavel II men Qazaqstan Respýblıkasynyń Tuńǵysh Prezıdenti Nursultan Nazarbaev bizdiń ártúrli dinderdiń, mádenıetter men tilderdiń ókilderi bolýymyzǵa qaramastan, baýyrlarymyz ben qaryndastarymyzdy birtutas adamzatqa biriktiretin myqty dıalog qurdy. Sondyqtan, men Álemdik jáne dástúrli dinder lıderleri Sezi Hatshylyǵyn oıdaǵydaı basqarǵan QR Prezıdenti Qasym-Jomart Toqaev myrzaǵa da qurmetimdi bildirgim keledi. Qasym-Jomart Toqaev dinder men mádenıetaralyq dıalogty ilgeriletý boıynsha úlken jumys jasady», – dedi Kardınal Miguel Ángel Ayuso Guixot.

Memorandým taraptardyń «Beıbitshilik pen birlesip ómir súrý maqsatyndaǵy adamzattyq baýyrlastyq týraly qujatty» qoldaýyn, sondaı-aq mádenıetter, etnostar men dinderdiń ózara túsinistigi men kelisimi boıynsha jobalar men is-sharalardy júzege asyrý úshin «Dıalog jónindegi birlesken komıtet» qurýdy, Álemdik jáne dástúrli dinder lıderleri Seziniń bastamalaryn, bitimgershilik prıntsıpteri, teńdik jáne tózimdilikti ózara qoldaý men ilgeriletýdi maqsat etedi.

Aıta ketsek, Álemdik jáne dástúrli dinder lıderleriniń sezin uıymdastyrý ıdeıasyn alǵashqylardyń biri bolyp katolık shirkeýiniń ókilderi qoldaǵan bolatyn.

2001 jyldyń 22-25 qyrkúıeginde Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń shaqyrýymen Rım Papasy Ioann Pavel II-niń Qazaqstanǵa tarıhı sapary ótti, bul eldegi jáne tutastaı alǵanda álemdik qoǵamdastyqta dinder men konfessııaaralyq qatynastardy damytýda úlken qoǵamdyq-saıası rezonans týdyrdy.

Dinaralyq dıalog jónindegi Papalyq Keńes – katolıkter men basqa dinderdi ustanýshylar arasyndaǵy ózara túsinistik, syılastyq pen yntymaqtastyq qaǵıdattaryn ilgeriletýge baǵyttalǵan konfessııaaralyq dıalogty nasıhattaý jónindegi Rım-katolık shirkeýiniń ortalyq mekemesi.