Nursultan Nazarbaev oblys ákimderine bıýdjet qarajatyn únemdep jumsaýdy tapsyrdy

ASTANA. QazAqparat - QR Úkimetiniń keńeıtilgen quramdaǵy otyrysynda Elbasy Nursultan Nazarbaev oblys ákimderine bıýdjetten bólingen qarajatty únemmen qaraýǵa shaqyrdy, dep habarlaıdy QazAqparat tilshisi.

«Keıbir óńirler jańa turǵyn úı alaptaryn sala bastady. Bul jaqsy. Biraq, ınfraqurylymnan shalǵaıda salyp, qarajatty tıimsiz jumsap jatyr. Qazir búkil álemde qala qurylysy tyǵyz salý arqyly júrgizilip jatyr. Óıtkeni, ol jerde kommýnıkatsııa, ystyq, sýyq sý bar. Aıdalaǵa salsań, ol jaqqa qubyr tartyp, jol salýyń kerek. Máselen, Qyzylordanyń sol jaǵalaýy degen shyqty. Astanada sol jaǵalaý bolsa, onda da sol jaǵalaý bolýy tıis sııaqty. Biz adamdardy ınfraqurylymǵa qaraı deımiz, kerisinshe emes. Saldyń. Al endi salǵannan keıin kópir, JES salý kerek, qubyr tartyp sý aparýyń kerek. Al Qyzylordanyń oń jaǵalaýynda jer joq pa? Qaraǵandyǵa deıin salam deseń qanshama jer bar», - dedi Elbasy Qyzylorda oblysynyń ákimi Qyrymbek Kósherbaevqa.

Os kezeginde oblys basshysy qala qurylysy bas josparǵa saı salynyp jatqanyn aıtyp aqtaldy. Alaıda óńir basshysynyń mundaı jaýaby Memleket basshysynyń kóńilinen shyqqan joq.

«Qaıdaǵy bas jospar? Bas jospardy biz jasaımyz, ózgertý engizemiz. Meniń oǵan qarsylyǵym joq. Alaıda qaraý kerek qoı, qanshama qarjy jumsalyp jatyr. Endi Pavlodar, Óskemen, Oral salsyn. Qosymsha baspana salǵannyń ornyna qubyr tartyp, jol men kópir salyp júrmiz. Memlekettiń aqshasyn nege únemdemeısińder», - dedi Nursultan Nazarbaev ákimderge qarata.