Nursultan Nazarbaev Qazaqstannyń kórshi eldermen qarym-qatynasyna baǵa berdi

ASTANA. QazAqparat -  Bolashaqta Qazaqstan júk tasymalynyń ózinen ǵana jylyna 5 mlrd dollar tabys alatyn bolady.  Bul týraly búgin elordadaǵy Beıbitshilik jáne kelisim saraıynda ótip jatqan  Qazaqstan halqy Assambleıasynyń XXVІ  sessııasynda sóz sóılegen Elbasy Nursultan Nazarbaev aıtty, dep habarlaıdy QazAqparat tilshisi.

«Reseı bizdiń tarıhı kórshimiz, Qudaı qosqan kórshimiz. Bizge deıin ómir súrdi, biz de ómir súrip jatyrmyz, bizdiń balalarymyz da tatý kórshi, dostyq jáne bir-birimen túsinistikte ómir súretin bolady. Qazaqstan men Reseı arasynda memleketaralyq qatynastyń úlgisi retinde óte jaqyn qarym-qatynas ornattyq. Biz bul ustanymǵa adalmyz jáne ony saqtaýymyz qajet. Óıtkeni bul Qazaqstannyń túbegeıli ustanymdaryna jaýap beredi. Reseı úshin de dál solaı ekenine senimdimin», - dedi Elbasy. 

Memleket basshysy Qazaqstan men Qytaı Halyq Respýblıkasy arasyndaǵy baılanystardyń da qarqyndy damyp kele jatqanyn basa aıtty.

«Biz qurlyqtyń dál ortasynda ornalasqan memleketpiz. Arzan kólik arterııasy sanalatyn teńizge shyǵar jolymyz joq. Sondyqtan Qytaımen baılanystarymyzdy qarqyndy damytyp jatyrmyz. Qazirgi ýaqytta Tynyq muhıtynan júkter Qazaqstan arqyly Eýropaǵa shyǵarylyp jatyr. Temirjol, avtomobıl joldaryn saldyq.  Búkil Qytaıdan Qazaqstan arqyly Reseıge, Eýropaǵa shyǵady.  Biz bolashaqta júk tasymalynan ǵana jylyna 5 mlrd  dollar tabys tabatyn bolamyz jáne taýarlarymyz da bul naryqqa shyǵyp otyr», - dedi QR Prezıdenti.