Nursultan Nazarbaev: Qazaqstannan basqa eshqaıda barǵym kelmeıdi
«Barlyǵyna tabys tileımin. Sapaly bilim jarqyn bolashaqqa jol ashady. Ýnıversıtette alǵan bilimdi tájirıbe júzinde iske asyryp, el ıgiligi úshin qyzmet etetin kez keldi. Qadamdaryńyz qutty bolsyn. Barshańyzǵa sáttilik, baıandy baqyt tileımin. Aıtatyn sóz bireý-aq: osy ýnıversıtettiń qabyrǵasynan ushyp shyǵyp, Qazaqsannyń túlegi bolyp jer júzin sharlaıtyn bolasyzdar. Qaıda júrseńder de umytpańdar - bizdiń búkil dúnıede jalǵyz Otanymyz bar. Ol - Qazaqstan. Solaı ǵoı!?» - dedi Elbasy.
Nursultan Nazarbaev Elbasy retinde kóp nárselerdi qaıta oılap júrgenin atap ótti.
«Oılaǵanymdy tujyrymdap, elge qyzmet etý jaıyn oılastyryp júrmin. Men dúnıeniń barlyq memleketterin aralaǵan adammyn. Ómirimde 200-den artyq prezıdentpen kezdestim. Premerlermen, ǵalymdarmen, saıasatkerlermen júzdestim. Dúnıeniń barlyq ádemi jerinde boldym. Sonyń bárin aralaǵanmen, qazir shynymdy aıtsam, Qazaqstannan basqa eshqaıda barǵym kelmeıdi. Demalysqa da. Qazaqstanda qazir bári bar. Byltyr arnaıy aralap, kóp jerdi kórdim. Qazaqstandyqtardyń kóbi teńizge barady. Kaspıı teńizinde qazir úlken keshen turǵyzyp, 4-5 juldyzdy qonaq úıler salynady. Ol eshqaısysynan kem bolmaıdy. Alakól men Býrabaı da sol. Almaty oblysynda taý-shańǵyly keshen ashylǵaly jatyr», - dedi ol.
Elbasy eldi kórkeıtip, týrıstik nysandardy damyta bersek, sheteldikter kóp keletinin atap ótti.
«Osy ýnıversıtetke de sheteldik stýdentterdi shaqyryp otyrmyn. Olar áli bile bermeıdi. Biraq, biletin bolady. Sebebi, sizder osy ýnıversıtettiń ataǵyn shyǵarasyzdar dep senemin», - dedi Nursultan Nazarbaev.
Eske sala ketsek, Nazarbaev ýnıversıtetinde saltanatty túrde V oqý bitirý rásimi ótip jatyr. Bıyl atalmysh ýnıversıtettegi túlekter sany - 963 stýdent. Onyń ishinde 565 stýdent - bakalavrıat, 378 stýdent - magıstratýra, 14-i - medıtsına doktory jáne 6 stýdent - doktorantýra baǵdarlamasy boıynsha oqý bitirip jatyr.
Túlekterdiń kópshiligi - Ǵylym jáne tehnologııalar mektebiniń (270 túlek), Injenerııa mektebiniń (225 túlek), Gýmanıtarlyq jáne áleýmettik ǵylymdar mektebiniń (168) bakalavrıat baǵdarlamasynyń stýdentteri. Magıstrlik baǵdarlama boıynsha Joǵary bıznes mektebin - 82 stýdent, Joǵary bilim berý mektebin - 80 túlek, Joǵarǵy memlekettik saıasat mektebin - 49 túlek, Injenerııa mektebin - 70 túlek, Ǵylym jáne tehnologııalar mektebin - 34 túlek, Gýmanıtarlyq jáne áleýmettik ǵylymdar mektebin - 19 túlek, Medıtsına mektebin - 27 túlek, Taý-ken isi jáne Jer týraly ǵylym mektebin - 20 túlek aıaqtaǵan.